వచ్చితినయ్యా

వచ్చితినయ్యా వచ్చితినయ్యా 
  వచ్చితినయ్యా రామయ్యా
వచ్చితినయ్యా నిన్నుచూడగా
  వచ్చితి సీతారామయ్యా

మెచ్చి నీవు వర మిచ్చెద వనుకొని

  వచ్చితి ననుకొన వలదయ్యా

ఇచ్చుట మానుట నీయిష్టమురా

  యినకువతిలకా రామయ్యా

గ్రుచ్చి యెత్తి నను కౌగలించుకొని

   కుశలం బడిగొదొ రామయ్యా

గ్రుచ్చి గ్రుచ్చి నీకోరచూపులతొ

   కుళ్ళబొడిచెదవొ రామయ్యా

ముచ్చటగా నీగోత్రనామముల

  నిచ్చట మార్చుట వింటినిరా

హెచ్చుగ కటకటపడి భద్రాద్రి

   ముచ్చట తలపక యుంటినిరా

మెచ్చని నీవును శ్రీరఘునాయక

   మిన్నకుండుటను చూచితిరా

ముచ్చటగా నాహృక్షేత్రమునకు

   విచ్చేయుమురా విహరింప

నిచ్చలు సీతారాముడ వని నిను

   ముచ్చటగా నే కొలిచెదరా

చచ్చు తెలివి నీగోత్రనామముల

   సరిదిద్దక నే కొలిచెదరా

అచ్చపు తెలివిడి నన్నివేళలను

   హరి సర్వాత్మక కొలిచెదరా

మచ్చరించ హర బ్రహ్మాదులు మన

   సిచ్చి నిన్ను సేవింతునురా