ఎంత మంచివాడవురా

ఎంత మంచివాడవురా యెంతని పొగడదురా

చింతలన్ని తీర్చినావు చిత్తజగురుడా

అంతులేని మోహంబుల నణచుట యది యెట్టులని

చింత జిక్కి యున్న నన్ను చేరదీసి

ఎంతలేసి మోహంబుల నిట్టే యణగించుదు నని

పంతమాడు నీనామమె పరగ నా కిచ్చితివి

అంతుపొంతు లేక సాగు నట్టి జన్మపరంపర

యెంతకాల మనుచు నేను చింతించగను

పంతగించి భవచక్రము పగులవేయు నీనామము

నెంతో దయ చూపి యినకులేశ నా కిచ్చితివి

పండీపండని భావములను వచ్చీరాని భాషలో

వండి కీర్తనల జేసి వడ్డించినను

నిండుమనసు తోడ మెచ్చి నీవు నీనామము నా

కండ జేయు చుంటివి కోదండరామ దండము