మనవులు వినవేలరా

 

మనవులు వినవేలరా యినకులతిలకా నీ
మనిషిని నే కానటరా యినకులతిలకా

జనపతి దశరథుని కొడుక యినకులతిలకా నీవు
ఘనుడవు నారాయణుడ వినకులతిలకా
జనకసుతను చేబట్టిన యినకులతిలకా నీవు
వనముల నొక మిష జొచ్చినా వినకులతిలకా

మునిలోకమునకు నీ వినకులతిలకా గొప్ప
ధనముగా దొరికితివో యినకులతిలకా
దనుజలోకమునకు నీ వినకులతిలకా లోక
హననకాల రుద్రుడవే యినకులతిలకా

వనధి దాటి లంక జేరి యినకులతిలకా నీవు
దునిమినావు దశకంథరు నినకులతిలకా
మనసార రామా యన్న నినకులతిలకా నీవు
కనికరమున కాచుచుందు వినకులతిలకా

హరేరామ హరేరామ

హరేరామ హరేరామ రామరామ హరేహరే

హరేకృష్ణ హరేకృష్ణ కృష్ణకృష్ణ హరేహరే

వామన గోవింద వాసుదేవా హరే

కామితవరవితరణ కంజలోచన హరే

శ్రీమానినీప్రియ భీమవిక్రమ హరే

శ్యామలాంగా దైత్యసంహారకా హరే

గోవర్ధనోధ్దార గోవింద హరే హరే

భావజమదసంహారభావిత శ్రీహరే

దేవదేవ సురగణసేవిత హరే హరే

జీవలోకశరణ్య క్షేమకృత్ శ్రీహరే

హరహర యంటే నేమిరా

హరహర యంటే నేమిరా

హరిహరి యంటే నేమిరా

అరయగ బేధము లేదురా

ఇరువురు నొకటే చూడరా

నీలకంఠుడై నీవు తలచితే

కైలాసంబున కనబడురా

నీలవర్ణుడని నీవనుకొంటే

ఆలో వైకుంఠాధిపుడౌ

కామవైరియై రామ రామ యని

నామము చేసే స్వామియే

కామజనకుడై కడు భక్తిగ శివ

నామ జపమునే నడపేరా

హరోం హరా యని యరచి పిలచినా

హరే రామ యన నొకటేరా

పరాత్పరుని యెడ భక్తిని జూపుచు

తరించిపోయెడు దారులవే

సంగరంబున రామచంద్రుడు

 

సంగరంబున రామచంద్రుడు విజయంబు 

    సాధించినాడిదే చూడండి

అంగనామణిసీత కారావణుని చెఱయు 

    నంతమైనది నేడు చూడండి

వచ్చి సమవర్తి పౌలస్త్యుని జీవుని 

    బంధించి కొనిపోయె చూడండి    

వచ్చి మన శ్రీరామచంద్రుని పొగడిరా 

    బ్రహ్మాదిదేవతలు చూడండి

రావణునికై దొమ్మిచేసి మన్నైనట్టి 

    రాకాసి మూకలను చూడండి

శ్రీవిభునికై యని చేసిన కపులెల్ల 

    జీవించియున్నారు చూడండి

తలబాదుకొనుచు మందోదరి పొలికలని 

    దారిబట్టుట గూడ చూడండి

కలికిసీతమ్మ సింగారించుకొని యిదే 

    కదలె రాముని కడకు చూడండి

నేనెంత పొగడ నేర్తురా

నేనెంత పొగడ నేర్తురా

నీనామ దివ్యమహిమను

ఎంతో పొంగి పొగడనా సంతోషముగ నామ

చింతనతో తాపత్రయ మంతరించగ

చింతలన్ని యణగారుట చిత్రమేమియు గాదు

అంతరించ తాపంబులు చింతలణగవా

ఎంతగ నిను పొగడినను యీవెఱ్ఱి మనసునకు

సుంతైనను తృప్తిగాదు జూడవయ్య

చింతితార్ధప్రద యయ్యది చిత్రమేమియు గాదు

వంతులుగా పొగడుచు దేవతలు తనిసిరా

శ్రీరామ పొగడలేడు శేషుడంత వాడే

వారిజాక్షపొగడలేడు బ్రహ్మయైనను

చేరి శివుడు పొగడు నది చిత్రమేమియు గాదు

మీరిరువురు గన నొక్కటి కారా యేమి

తెలిసీతెలియక

తెలిసీతెలియక దేవతలను నే 

    కొలిచితినయ్యా కొందరిని

తెలియనైతి శ్రీరఘురామా నీ

    దివ్యతత్త్వమును నేనపుడు

దేవతలిచ్చెడు సిరిసంపదలను 

    తినితిని మిక్కిలి సోమరినై

భూవలయంబున నిక్కుచు తిరుగుచు 

    పొందితి సుఖములు కొన్నిటిని

కోవెలలోపల కొలువైన నిను 

    కొలువగ నెన్నడు రానైతి

దేవదేవ సమవర్తికి చిక్కితి 

     తిప్పలుబడితిని మిక్కిలిగ

కాలక్రమమున నొక జన్మంబున 

    కాశిని దేహము విడచితిని

కాలకంఠుడు మంత్రము చెవిలో 

    కమ్మగ నుపదేశించగను

మేలగు భవతారకమంత్రముచే 

    మెఱసె నాత్మలో సద్భక్తి

ఈలాలగున నీనామము విడువని 

    యీదేహములో చేరితిని

వదలను భవతారకమంత్రంబును 

    వదలను నీపద యుగ్మమును

ముదమున నీశుభతత్త్వము నెఱిగితి 

    మోక్షార్హుడనే నైతినయా

వదలను నిన్ను వదలను నిన్ను

    వదలను నిన్నని యనవయ్యా

ఇది కడజన్మం బిది కడజన్మం 

    బిది కడజన్మం బనవయ్యా

చక్కగ దయజూపే సాకేత రామా

చక్కగ దయజూపే సాకేత రామా

నిక్కంబుగ చాలును నీనామమె మాకు

తక్కిన దేవతల నెపుడు తలపనట్టి వారము

నిక్కు నరాథముల కెపుడు మ్రొక్కనట్టి వారము

చక్కగ నీనామ జపము చేయునట్టివారము

మిక్కిలి భక్తులము నీకు చక్కనయ్యా

ఎక్కడెక్కడి సంపద లాశించనట్టి వారము

చిక్కుపడిన తనువులపై చింతలేని వారము

ప్రక్కదారిపట్టక నిను భజనచేయు వారము

స్రుక్కము యమునకును మేమొక్కనాడును

దిక్కు నీనామమనుచు తెలిసినట్టి వారము

మక్కువతో నీపదముల మసలునట్టి వారము

ఎక్కడిదిక పాపమనుచు నెంచునట్టి వారము

చిక్కెనిదే మోక్షమనుచు నిక్కు వారము

ఇటుప్రక్కన

కం. ఇటుప్రక్కన భూసుతయును

నటుప్రక్కన లక్షణుండు నమరగ రామా

యిట దాసుండని హనుమగ

నిటలాక్షుడు చేరె పాదనీరేజములన్

కాదనవని లేదనవని

కం. కాదనవని లేదనవని 

శ్రీదయితా నిన్ను నేను చేరి యడుగగా

మోదముతో నామోక్షము  

నే దయతో యిత్తు నంటివే రామయ్యా

నా దైవమ నా భాగ్యమ

కం. నా దైవమ నా భాగ్యమ

నీ దయనే నమ్మి నేను నిలచితి నయ్యా 

వేదన లణగించపయా

కాదని కో రామచంద్ర కరుణాజలధీ

నిను శంకించెడు వారును

కం. నిను శంకించెడు వారును

పనిబడి యర్చించు వారు బహుదీనాత్ముల్

కనుగొన జ్ఞానులు నందరు

వినుతదయాశీల నీకు ప్రియులే రామా

నరనాయక సురనాయక

 

కం. నరనాయక సురనాయక

కరుణామయ రామచంద్ర కమలదళాక్షా

వరదాయక శుభదాయక

పరిపాలయ మా మశేషపాపవిదారా

శ్రీరామనామము కన్న మధురము

 

శ్రీరామనామము కన్న మధురము

    వేరొక్క టెందును లేదయ్యా

శ్రీరామచంద్రుని కన్న దైవము 

    వేరొక్క డెవ్వడు లేడయ్యా 

రామనామమును పలికెడు వారికి

    రాదిక జన్మము నిజమయ్యా 

రామచరితమును నుడివెడు వారికి 

    రాదిక జన్మము నిజమయ్యా

రాముని కీర్తన చేసెడు వారికి

    రాదిక జన్మము నిజమయ్యా

రాముని కీర్తిని చాటెడు వారికి

    రాదిక జన్మము నిజమయ్యా

రాముని సేవను మరువని వారికి

    రాదిక జన్మము నిజమయ్యా

రాముని మనసున నిలిపిన వారికి

    రాదిక జన్మము నిజమయ్యా

రామభక్తులై మనియెడు వారికి

    రాదిక జన్మము నిజమయ్యా

రామున కన్యము నెరుగని వారికి

    రాదిక జన్మము నిజమయ్యా

రాముడు నారాయణుడని తెలిసిన 

    రాదిక జన్మము నిజమయ్యా

రాముడు విశ్వాత్మకుడని తెలిసిన 

    రాదిక జన్మము నిజమయ్యా

రామమయం బీజగమని తెలిసిన

    రాదిక జన్మము నిజమయ్యా

రాముని బంటుగ చరియించినచో

    రాదిక జన్మము నిజమయ్యా

చాలదా శ్రీరామచంద్ర యనే నామము

చాలదా శ్రీరామచంద్ర యనే నామము

చాలదా యీజన్మకు చక్కని హరినామము

చాలదా బ్రహ్మాదులు చాలపొగడు నామము

చాలదా సర్వలోకసన్నుతుని నామము

చాలదా సర్వేశుని సకలశుభద నామము

చాలదా జననమరణచక్రాంతకు నామము

చాలదా మనసు నెపుడు చల్లబరచు మంత్రము

చాలదా సర్వలోకశాంతి గూర్చు మంత్రము

చాలదా దీనికన్న చక్కనైన దేమంత్రము

చాలదా యిదిచాలని జనున కేది చాలును

సన్మంత్రము దీనికన్న జగము నందు లేదు

సన్మార్గము రామమంత్ర జపమేనని తెలియుడు

జన్మమెత్తినందుల కిది చాలునని పలుకుడు

తన్మయులై పలికి భవతరణమునే చేయుడు

వగచెద నెంతో వగచెద

వగచెద నెంతో వగచెద కాని

    ఫలితమేమియును లేదు కదా

వగచుట కంటెను ముదిమి ప్రాయమున

    మిగిలిన దేమియు లేదుకదా

లక్ష్యముచేయక పెద్దల నుడు లప

    రాధినైతినని వగచెదను

భక్ష్యాభక్ష్యవివేకము నెఱుగక

    భక్షించితినని వగచెదను

సాక్ష్యమెవ్వడని పలికిన వేల య

    సత్యము లెన్నుచు వగచెదను

సాక్ష్యమైన నాయాత్మసాక్షిని

    చక్కగ దలచుచు వగచెదను

ధనమే సర్వస్వంబని తలచెడు

    చెనటినైతినని వగచెదను

తనవారని పగవారని తలచుచు

    ధర్మమెన్ననని వగచెదను

వనితావ్యామోహంబున జిక్కుట

    వలన చెడితినని వగచెదను

తను విది శాశ్వత మన్న విధంబున

     తలచి చెడితినని వగచెదను

చేయరాని పను లెన్నియొ పొగరున

    చేసియుంటినని వగచెదను

మాయలుచేసెడు కలికి లోబడుచు

    మంచినెఱుగనని వగచెదను

చేయిదాటిపోయినది కాల మిక

    చేయున దేమని వగచెదను

ప్రాయము నందున రామనామమును

    చేయనైతినని వగచెదను

నావంటి వానిపైన

నావంటి వానిపైన నీవు దయ చూపుదువని

భావించెడు నంత వెఱ్ఱివాడను కాను

సదాచారమేమి లేదు చట్టుబండయును లేదు

ముదమున నీపూజచేయు ముచ్చటలేదు

కదిలి నీగుడికి వచ్చి ఘడియ యుండుట లేదు

వదలక నీనామమైన పలుకుట లేదు

నీభక్తులసావాసము నేను చేయుట యేడ

శోభనాకార భక్తి సుంతయు లేదు

వైభవముగ నీకు భజన నేనుచేయుట యేడ

నీభజనలు జరుగుచోట నిలుచుట లేదు

ఏముఖమునుపెట్టుకొని యిపుడు నీదయవేడుదు

నీమంచితనము మీద నెపముంచుదును

రామచంద్ర నాకు మంచి లక్షణ మొక్కటి లేదు

ఏమో నాదురాశతప్ప యేమియు లేదు

ఏల నితరము లందు మేలెంచుట

ఏల నితరము లందు మేలెంచుట

మేలెంచి భంగపడి జాలొందుట

శ్రీరామచంద్రుని నామంబునే గాక  

    జిహ్వ కన్యము పల్క నేల

శ్రీరామచంద్రుని రూపంబునే గాక 

    ప్రీతి నక్షుల జూడ నేల

శ్రీరామచంద్రుని పూజించనే గాక 

    చేతు లీరెండు మన కేల

శ్రీరామచంద్రుని పాదంబులకు గాక 

    శిరసు వంచగ నెంచ నేల

శ్రీరామచంద్రుని సంకీర్తనము గాక 

    చెవిబెట్ట నుంకించ నేల

శ్రీరామచంద్రుని చరితంబునే గాక 

    యారాటముగ చదువ నేల

శ్రీరామచంద్రుని భక్తకోటిని గాక 

    చేరి యన్యుల గొల్వ నేల

శ్రీరామచంద్రుని యశము జాటగ గాక 

    క్షితిపైన నుండగా నేల

శ్రీరామచంద్రుని క్షేత్రంబులను గాక 

    చేరగా కోరగా నేల

శ్రీరామచంద్రుని సేవించనే గాక 

    జీవితం బిది యుండ నేల

శ్రీరామచంద్రుని దివ్యతత్త్వము గాక 

    చిత్తంబు చింతించ నేల

శ్రీరామచంద్రుని చేరుకొనుటయె గాక 

    వేరొండు యాశ లింకేల

రామచంద్ర హరి నమోస్తుతే

రామచంద్ర హరి నమోస్తుతే

కామితవరద నమోస్తుతే

శ్రీరఘునందన నమోస్తుతే 

    సీతారామా నమోస్తుతే 

వారిధిబంధన నమోస్తుతే  

    పౌలస్త్యాంతక నమోస్తుతే 

భూరికృపాళో నమోస్తుతే 

    పురుషోత్తమ హరి నమోస్తుతే

నారాయణ హరి నమోస్తుతే  

    జ్ఞానమయాకృతి నమోస్తుతే

ఇనకులతిలకా నమోస్తుతే 

    వనజదళేక్షణ నమోస్తుతే

దనుజవిరామా నమోస్తుతే 

    మునిమఖరక్షక నమోస్తుతే

మునిజనకామిత నమోస్తుతే 

    మోహనరూపా నమోస్తుతే 

జననాథోత్తమ నమోస్తుతే 

    జగదభిరామా నమోస్తుతే

భాసురవిక్రమ నమోస్తుతే

    భండనపండిత నమోస్తుతే

కోసలనాయక నమోస్తుతే

    కోదండధర నమోస్తుతే

దాసజనావన నమోస్తుతే

    దశరథనందన నమోస్తుతే

వాసవాదినుత నమోస్తుతే

    వైకుంఠాధిప నమోస్తుతే

శ్రీరామ జయరామ సీతారామ

శ్రీరామ జయరామ సీతారామ

    శ్రీరామ జయరామ జయజయ రామ

శ్రీరామ  రఘురామ సీతారామ

    శ్రీరామ జయరామ జయజయ రామ

శ్రీరామ గుణధామ సీతారామ

    శ్రీరామ జయరామ జయజయ రామ

శ్రీరామ ఘనశ్యామ సీతారామ

    శ్రీరామ జయరామ జయజయ రామ

శ్రీరామ  మునికామ సీతారామ

    శ్రీరామ జయరామ జయజయ రామ

శ్రీరామ శుభనామ సీతారామ

    శ్రీరామ జయరామ జయజయ రామ

శ్రీరామ రణభీమ సీతారామ

    శ్రీరామ జయరామ జయజయ రామ

శ్రీరామ పరంధామ సీతారామ

    శ్రీరామ జయరామ జయజయ రామ

అందమైన శ్రీరాముని

అందమైన శ్రీరాముని జూడగ 

    నరుగుదమా గుడికి మన

మందరమును శ్రీరాముని జూడగ 

    నరుగుదమా గుడికి

కనులవిందుగ గుడిలో కొలువై 

    కనబడు మన శ్రీరాముని

హనుమల్లక్ష్మణసీతాయుతుడై 

    యలరారే మన రాముని

ధనువును దాలిచి చిరునగవులతో 

    దరిసెన మిచ్చెడు రాముని

మనకోరికలను వినినవెంటనే 

    మన్నించెడు మన రాముని

వచ్చిన యార్తుల దయతో జూచుచు

    వలదిక భయమను రాముని

హెచ్చిన కౌతుకమున తన సన్నిధికి

    వచ్చిన మెచ్చెడు రాముని

ముచ్చట లడుగుచు మ్రొక్కెడు వారల

    బుధ్ధుల నెరిగెడు రాముని

సచ్చరితులు విజ్ణానులు వచ్చిన

     సంతోషించెడు రాముని

శ్రీరామ్ శుభనామ్ సీతారామ్

శ్రీరామ్ శుభనామ్ సీతారామ్ హరి 

  శ్రీరామ్ రఘురామ్ సీతారామ్
శ్రీరామ్ గుణధామ్ సీతారామ్ హరి 

  శ్రీరాం జయరామ్ సీతారామ్

శ్రీరామ్ దశరథనందన రామ్ 

  శ్రీరామ్ రవికుల భూషణ రామ్
శ్రీరామ్ మునిమఖరక్షక రామ్ 

  శ్రీరామ్ మునిజనసన్నుత రామ్
శ్రీరామ్ దశముఖమర్ధన రామ్ 

  శ్రీరామ్ సురగణప్రస్తుత రామ్
శ్రీరామ్ భక్తజనావన రామ్ 

  శ్రీరామ్ మోక్షప్రదాయక రామ్

శ్రీరామ్  కంజదళేక్షణ రామ్ 

  శ్రీరామ్ కార్ముకభంజన రామ్ 
శ్రీరామ్ ధర్మవివర్ధన రామ్  

  శ్రీరామ్ దానవభంజన రామ్  
శ్రీరామ్ నిరుపమవిక్రమ రామ్  

  శ్రీరామ్ నిత్యనిరంజన రామ్
శ్రీరామ్ సజ్జనరంజన రామ్ 

  శ్రీరామ్ భవభయభంజన రామ్

ఏమండీ ఆమోక్ష మెట్లు వచ్చును

ఏమండీ ఆమోక్ష మెట్లు వచ్చును
రాము డిచ్చు నందురా ఆమోక్షము

రామనామ మొకటి లేక రాదు మోక్షము శ్రీ 
రామ రామ రామ యనక రాదు మోక్షము

రాముని సత్కృపయె లేక రాదు మోక్షము శ్రీ 
రామునిపై భక్తి లేక రాదు మోక్షము

రాముని సేవించకుండ రాదు మోక్షము శ్రీ 
రామభజనపరత లేక రాదు మోక్షము 

రామ తత్త్వ మెరుగకుండ రాదు మోక్షము శ్రీ 
రామచింతనపరుడు గాక రాదు మోక్షము 

రాముని కీర్తించకుండ రాదు మోక్షము శ్రీ 
రాముని పూజించకుండ రాదుమోక్షము

రామపాద మంటకుండ రాదు మోక్షము శ్రీ 
రాము డీయకుండ నీకు రాదు మోక్షము

శ్రీరఘురాముని నమ్మండి

శ్రీరఘురాముని నమ్మండి శ్రీరఘురాముని తెలియండి

శ్రీరఘురాముని చేరండి శ్రీరఘురాముని కొలవండి

శ్రీరఘురాముని చిత్తము నందున చేర్చిరహించిన  కైవల్యం

శ్రీరఘురాముని కన్యము నెఱుగక జీవించినచో కైవల్యం

శ్రీరఘురాముని తత్త్వము నిత్యము చింతించినచో కైవల్యం

శ్రీరఘురాముని సేవను విడువక చేయుట మరగిన కైవల్యం

శ్రీరఘురాముని కథలను నిత్యము ప్రీతిగ చదివిన కైవల్యం

శ్రీరఘురాముని కీర్తన లెప్పుడు చెలగుచు పాడిన కైవల్యం

శ్రీరఘురాముని నామము విడువక చేయుచు నుండిన కైవల్యం

శ్రీరఘురాముని భక్తిని విడువక జీవించినచో కైవల్యం

శ్రీరఘురాముని సత్కృప వలననె జీవికి కలుగును కైవల్యం

శ్రీరఘురాముని దాస్యము చేసిన జీవికి కలుగును కైవల్యం

శ్రీరఘురాముని మరువక బ్రతికే జీవికి కలుగును కైవల్యం

శ్రీరఘురాముని సీతారాముని చేరి పొందుడీ కైవల్యం

రామరామ యన వేలా

రామరామ యన వేలా శ్రీరఘురాముని కొలువ వదేలా

రామనామమును మించిన మంత్రము భూమిని లేదని చక్కగ నెఱిగియు

రామనామమును చేసిన జీవులు రయముగ మోక్షము పొందుట నెఱిగియు

రామదాసులకు సర్వసంపదలు రాముడు తప్పక నిచ్చుట నెఱిగియు

రామదాసులకు రాముడె యోగక్షేమము లరయుచు నుండుట నెఱిగియు

రామనామమును శివుడే నిత్యము ప్రేమగ ధ్యానము చేయుట నెఱిగియు

రామనామమును పలికిన వినినను రోమహర్షణము కలుగుట నెఱిగియు

రాముడు శ్రీమన్నారాయణుడని బ్రహ్మాదులు ప్రకటించుట నెఱిగియు

రాముని కన్నను దైవము లేడని భూమినందరును పొగడుట నెఱిగియు

బ్రహ్మాదికసురపూజ్యుడు రాముడు భగవంతుం డని బాగుగ నెఱిగియు

బ్రహ్మానందము రామనామమును పాడుటలోనే కలదని యెఱిగియు

సర్వకాలముల రామనామమును చక్కగ జేయగ దగునని యెఱిగియు

సర్వాత్మకుడగు రాముం డొక్కని శరణము జొచ్చిన చాలని యెఱిగియు

నారాయణ యని

నారాయణ యని నా తండ్రీ యని నోరారా పిలవండి 
శ్రీరామా యని శ్రీకృష్ణా యని నోరారా పిలవండి

ముప్పొద్దులను మెక్కుటకేనా మూతి దేవుడిచ్చె

ఇప్పటికైనా తెలివి తెచ్చుకొని యీశుని పిలవండి

తప్పుడుమాటలు పలుకుటకా హరి తలకు తెలివినిచ్చె

తప్పు తెలుసుకొని హరినామములే యొప్పుగ పలకండి

దేవుళ్ళాడగ రుచులకు జిహ్వను దేవుడిచ్చినాడా

శ్రీవిభునామము నిప్పటికైనా జిహ్వకు చేర్చండి

దేవుడు నరులను పొగడుటకేనా తెలివికి నీకిచ్చె

దేవదేవుని నామము పలికే తెలివి తెచ్చుకోండి

రామనామ మన్నది

రామనామ మన్నది కడు రంజు గున్నది

అది యేమేమో సుఖము లందించు చున్నది

చెవుల కది సోకిన సుఖమే సుఖము

చవుల నాలుక కదే చక్కటి సుఖము

అవిరళముగ నెడదలో నమరుచు సుఖము

భవశృంఖలలు త్రెంచి భలేసుఖము

స్మరణముచే మనసున శాంతియు సుఖము

నిరత మాత్మానంద నిర్మల సుఖము

హరిదయాలబ్ధిచే నద్భుతసుఖము 

మురిపించుచు నిచ్చే మోక్షసుఖము 

జయభయహరణా

జయభయహరణా జయభవహరణా

జయశుభచరణా జానకిరమణా

జయజయ దశరథనందన రామా జయ రఘువర రామా

జయజయ సీతానాయక రామా జయ రఘువర రామా

జయజయ దనుజవినాశక రామా జయ రఘువర రామా

జయజయ సర్వశుభంకర రామా జయ రఘువర రామా

జయ మునిజనసన్నుత శుభవిగ్రహ జయ రఘువర రామా

జయ సురవరసన్నుత శుభవిక్రమ జయ రఘువర రామా

జయ బుధవరసన్నుత శుభదాయక జయ రఘువర రామా

జయ  జయకారణ జయశుభకారణ జయ రఘువర రామా

జయజయ తారకనామా రామా జయ రఘువర రామా

జయజయ త్రిజగత్పోషక రామా జయ రఘువర రామా

జయజయ భక్తజనాశ్రయ రామా జయ రఘువర రామా

జయజయ మంగళవిగ్రహ రామా జయ రఘువర రామా

రామ రామ యని

రామ రామ యని వినబడగానే రాకాసులు పరుగెత్తేరు

రామదాసులు కనబడగానే రాకాసులు పడిపోయేరు

రామా యని యెవరెవరిని పిలిచిన రాకాసులు వెరగందేరు

రాముని బాణము గురితప్పదని రాకాసులు  పరుగెత్తేరు

రాముని గుడి గల యూరుల వంకకు రాకాసులు రాకుండేరు

రాముని నమ్మెడు మనుజుల జోలికి రాకాసులు రాకుండేరు

రాముని బంటుల బంటుల జోలికి రాకాసులు రాకుండేరు

రాముని రాజ్యపు పొలిమేరలకు రాకాసులు రాకుండేరు

శ్రీరాముల కీర్తనమును

శ్రీరాముల కీర్తనమును చేయవలయును
దారుణభవసాగరమును దాటవలయును

వారి వీరి గొలుచుబుధ్ధి వదలవలయును
నారాయణసేవకే నడువవలయును
ఊరివారి గొడవలలో దూరుట మాని
తీరుగ హరిభక్తులతో చేరవలయును

తలపులు హరిచరితములే తడువవలయును
పలుకులు హరినామములే పలుకవలయును
వలచిన హరిచేరికనే వలచవలయును
నిలచిన హరిసన్నిధినే నిలువవలయును

హరిమయ మీవిశ్వమనున దెఱుగవలయును
హరికన్యము మిథ్య యనున దెఱుగవలయును
హరేరామ యనుచు నెపుడు మురియవలయును
హరేకృష్ణ యనుచు జగము మరువవలయును

how to start using pramukj IME

•  Download Pramukhe IME I have given.
• Extract the folder from the zip downloaded.

Now your folder shoould look as bellow.

Next you need to go into the folder and  double click on the application PramukhIME.

Then you will find a ballon appear at the bottom of your screen on the  right handside It will be as shown bellow.

Now your Pramukh IME is active.  

Where is the application? How to enable Telugu?

First where is the applcaitoon?  You have it in the system trey as show in the following picture.
The trey is on the RHS and could be hidden by an upper arrow mark. Let's see the picture on my desktop.

Now You need to bring up the system trey and click on the icon for the IME. It has the current language marked. Initially it will be EN for English.

As yo click the icon, you will find a list open up as shown in the following picture.

Now select Telugu.

The list vanishes.  Telugu is your typing language. You can open this list any time and check Help or show the keyboard to see how to type. generally it is phonetic.

Any time press F9 button on your keyboard and you will go back to English. Again F9 will bring you Telugu.

Simple.

నీనామము నోటనుండ

నీనామము నోటనుండ నీవు నా యెడదనుండ
దేనికయా చింత నాకు దేవదేవ రామా

దుర్మదవిధ్వంసకమై తోచుచుండు నీనామము
కర్మక్షయకారకమై కలుగుచుండు నీనామము
నిర్మలశుభదాయకమై నిలచుచుండు నీనామము
ధర్మాత్ముల జిహ్వలపై తాండవించు నీనామము

సకలసంపదల నొసంగ చక్కనైన నీనామము
సకలతాపముల నడంచు చల్లనైనన నీనామము
సకలసుజనసేవ్యమైన శర్మదమగు నీనామము
సకలజీవులకును ముక్తిసాధనమగు నీనామము

దీనబాంధవుడవైన దేవదేవ నీనామము
ధ్యానించెడు వారినెల్ల దయచూచెడు నీనామము
అనందదాయకమై యలరారెడు నీనామము
నానుడువుల కులుకుచుండి నన్నేలెడు నీనామము

రామ రామ శ్రీరామా

రామ రామ శ్రీరామా యను మని ప్రేమగ శివుడే బోధించె
రామనామమును చేయక మోక్షము రాదని చక్కగ బోధించె

శ్రీవిభునకు సరిదైవము లేడని శివుడు సూటిగా బోధించె
భూవలయంబున రామచంద్రుడై పుట్టెను హరి యని బోధించ
జీవులందరకు రామనామమే సిధ్ధౌషధమని బోధించె
భావము నందున రాముని నిలిపిన బ్రతుకు పండునని బోధించె

అందరు రాముని నామము చేయుట కర్హులె సుమ్మని బోధించె
అందమైన యీనామమునకు సరి యెందును లేదని బోధించె
వందనీయుడగు రాముని ధ్యానము వదలకుండుమని బోధించె
మందబుధ్ధులకు మాత్రము రాముని మహిమ తెలియదని బోధించె

హరిని పొగడండి

హరిని పొగడండి మీరు హరినే పొగడండి
హరిని పొగుడు సుజనులకే యపవర్గం మండి

శరణాగతవత్సల యని హరినే పొగడండి

కరుణారససాగర యని హరినే పొగడండి 

సురగణైకపోషక యని హరినే పొగడండి 

సురవైరివినాశక యని హరినే పొగడండి

పరమపురుష యని మీరు హరినే పొగడండి 

పరమయోగి సేవితుడని హరినే పొగడండి 

పరమాత్ముడ ననుచు మీరు హరినే పొగిడిండి

పరమభక్తు లగుచు మీరు హరినే పొగడండి

హరేపరాత్పరా యని హరినే పొగడండి

వరదాయక యని మీరు హరినే పొగడండి

హరేరామ యని మీరు హరినే పొగడండి

హరేకృష్ణ యని మీరు హరినే పొగడండి

చేయండి తరచుగ

 చేయండి తరచుగ శ్రీరామనామం
    చేయండి చేయండి చేయండి 
చేయండి మోక్షము సిధ్ధించునండీ
    చేయండి చేయండి చేయండి 

చిత్తశాంతిని మీకు చేకూర్చు నామం

    చేయండి చేయండి చేయండి

చిత్తశుద్ధిగ మీరు శ్రీరామ నామం

    చేయండి చేయండి చేయండి 

చిత్తమున వలచి శ్రీరామ నామం 

    చేయండి చేయండి చేయండి 

చిత్తుచిత్తుగ కలిని చెండాడు నామం

    చేయండి చేయండి చేయండి 

చింతలన్నింటిని చిదిమెడు నామం

     చేయండి చేయండి చేయండి 

చింతితార్ధము నిచ్చు శ్రీరామ నామం 

    చేయండి చేయండి చేయండి 

చెంతనుండి శుభము చేకూర్చు నామం

    చేయండి చేయండి చేయండి 

చింతింపకన్యంబు శ్రీరామ నామం 

     చేయండి చేయండి చేయండి

ఎరుక గలిగితే

 ఎరుక గలిగితే యెల్లతావులను 
    హరి పరమాత్ముడు ప్రత్యక్షం 
చరాచరంబుల నెల్ల వేళలను 
    సర్వాత్ముడు హరి ప్రత్యక్షం 

దేహధారులను పాత్రలతో హరి 
    దివ్య నాటకము సృష్టి యని
మోహము చెందక పాత్రను నిలచుట 
    బుద్ధిమంతుల కొప్పునని

హరేరామ యని హరేకృష్ణ యని 
    ఆనందముతో పలుకగను
హరికన్యంబగు నదియే లేదని 
    అంతరంగమున చక్కగను

మరపు లేక హరినామము పొందే 
    మనసును నిలుపుట కార్యమని
హరినామంబును హరియును నొకటే 
    యనుచు చక్కగా హృదయమున