14, సెప్టెంబర్ 2016, బుధవారం

శ్రీరామసార్వభౌమ చిత్తగించవయ్య



శ్రీరామసార్వభౌమ చిత్తగించవయ్య
యీరోజు రే పనవల దిపుడే మన్నించవయ్య

సారహీనమైన సంసార మందు ద్రోసి
ధారుణిపై త్రిప్పిత్రిప్పి దండనములు చేసి
క్రూరమైన యీమాయ కుటిలబుద్ధి చూపి
ఘోరకర్మపాశవితతి పేరిచి ననుబట్టె
శ్రీరామ

వేమారులు పుట్టిగూడ విషయము లందుండి
కామాదుల గెలువకుండ కాసులను రోయక
నీనామ మెఱుంగకుండ నీతత్త్వ మెఱుగక
నీమార్గము పట్టకుండ నేనెంతో చెడితి
శ్రీరామ

చాలుచాలు చెడిన దింక నీలావు తెలిసితి
మేలుచేయవయ్య నాకు మిగిలిన బంధముల
నీలీలను తొలగించుము నీకుపుణ్యముండు
వాలాయము నీకు దీనపాలనంబు దేవ
శ్రీరామ