శ్రీరామనామ మొకటి

శ్రీరామనామ మొకటి చేరెను మదిలో
ఆరామనామమయ మాయెను బ్రతుకే

నాలుకపైకెక్కి యది నాట్యమాడ జొచ్చినది

చాలుననుచు వ్యర్ధప్రసంగములు మానెనది

కనులలోన చేర నది కైపు తలకెక్కినది

కనును రామమయముగా కనులు జగమంతటిని

తలలోపల చేరి యది తలపులన్ని మార్చినది

తలపులన్ని రామపాదములమీద వ్రాలినవి

సర్వేంద్రియముల నది శాసించగ దొడగినది

యుర్వి నన్యకార్యముల కురుకుట నవి మానినవి

ఆత్మ నది యాక్రమించి యతిశయించి నిలచినది

ఆత్మేశుడు రామునిలో నది కలసిపోయినది