పొగడుదునా నిను

పొగడుదునా నిను పురుషోత్తమా నాపొగడికలకె యుప్పొంగేవా

పొగడుచు నేను చాల మురియుటయే గాని
జగదీశ నీగొప్ప చాటుట నాతరమె
నగజేశ యురగేశ నారదాదుల వలె
మిగులచక్కగ నిను పొగడలే నాయె

త్రిగుణాతీతునకు దేవదేవునకు నే
పొగడికలకు మన ముప్పొంగదని
నగరాజధర నా మనసున నెఱిగియు
మిగులచక్కని ప్రేమమీఱగ నిత్యము

రామ నీనామమును రక్కసుడును పొగడ
నేమని పొగడక నిల నుందునయా
కామితవరద నీఘనత దినదినమును
వేమరు పొగడక విడువనేరను సూవె