మందన్న నిదియే మందుకదా బుధు
లందరు మెచ్చిన మందుకదా
వేయిజన్మలుగ వదలని బాధల వెడలించే దీమందుకదా
మాయదారి భవరోగము నిట్టేమాయము చేసే మందుకదా
ఆరువిధంబుల రోగలక్షణము లన్నిటి నణచే మందుకదా
తీరని మమతయు నహమను చిత్తవికారము లణచే మందుకదా
కల్లదైవముల గొలిచే వెఱ్ఱిని కట్టడిచేసే మందుకదా
ఉల్లము చక్కగ హరిపై నిత్యము నల్లన నిలిపే మందుకదా
రామనామమను పేరుగలిగిన రసవంతమగు మందుకదా
భూమిని దీనినిమించిన దేదీ పుట్టని ఘనమగు మందుకదా
