మీరు ధన్యజీవులు

మీరు ధన్యజీవులు మీరు హరిని చేరెదరు
మీరు భూమి కింక తిరిగి రారు రారు రారు

నరులారా శ్రీహరినే నమ్ముకున్నారు మీరు

పరమపురుషు డతనిపై భక్తి గలవారు

సిరు లశాశ్వతము లని యెఱిగియున్నారు మీరు

తరచు హరిసేవ లందు మురియుచున్నారు

పురుషోత్తము డతడినే పొగడుచున్నారు మీరు

పరుల నెపుడు పొగడ మని పలుకుచున్నారు

హరితీర్ధము లెల్లప్పుడు తిరుగుచున్నారు మీరు

హరికథలను తడవి తడవి మురియుచున్నారు

హరిసన్నిధి మాకు నిత్య మనుచునున్నారు మీరు

హరినామము భవతారక మనుచునున్నారు

హరినామామృతమె చాలు ననుచునున్నారు మీరు

హరేరామ యనుచు నెపుడు మురియుచున్నారు