ఎంతదాక సంసారం బెంతదాక

ఎంతదాక సంసారం బెంతదాక నాకు

వింతగొలుపు సంసారం బెంతదాక

హరి గలడని నీవెఱిగెడు నంతదాక నీవు
హరి దేవుండని యెఱిగెడు నంతదాక

హరిమీదను వలపుగలుగు నంతదాక నీకు
హరితలపులు నిత్యమగు నంతదాక

హరితత్త్వము నీవెఱిగెడు నంతదాక నీవు
హరిమార్గము నందు నడచు నంతదాక

హరినామము నోటి కబ్బునంత దాక నీకు
హరినామపు రుచి తెలియు నంతదాక

హరినామమె ముఖ్య మగు నంతదాక నీకు
హరినామము లోక మగు నంతదాక

హరియె నీకు సర్వమగు నంతదాక నీకు
హరికన్యము లేకపోవు నంతదాక

హరేరామ యని పలికెడు నంతదాక నీవు
హరేకృష్ణ యని పలికెడు నంతదాక

హరి పట్లను భక్తినిలుచు నంతదాక నీవు
హరిపాదము లాశ్రయించు నంతదాక