ధీమంతులు భజియించుచు నుందురు దీక్షగ నిరతమును
వారలు సంపద లాశించకయే భజియింతురు హరిని
ధారుణి సంపద లానందమునకు కారణములు కావు
కారణములనే భ్రమకలుగుటకు కారణము మాయ
పారద్రోలి పెనుమాయను రాముని భజియింతురు బుధులు
వారలు కోరిక లన్నియు విడచి భజియింతురు హరిని
ధారుణి నుండెడి వస్తుచయమున కోరదగిన దున్నె
కోరదగినదా పరమానందమె కువలయవాసులకు
నేరుపు మీరగ రామనామజపనిష్ఠ నుందురు బుధులు
వారలు వీరిని వారిని గొలువక భజియింతురు హరిని
వారిని వీరిని సేవించుటలో పరమార్ధము లేదు
శ్రీరఘురాముని సేవించుటలో క్షేమము గలదనుచు
ధీరులు విడువక రామనామమున తెరలుచుందు రెపుడు
