పొగడ నెన్నెన్నో కలవు పొలుపైన గుణములు

పొగడ నెన్నెన్నో కలవు పొలుపైన గుణములు
జగమేలు స్వామికి మన జానకీపతికి

పరాక్రమమునందు వీని వంటి వాడొకడు లేడు
కరుణారస సముద్రుడని ఘనత కెక్కెను వీడు
నిరుపమాన సత్యవ్రతుడు నిశ్చలసంకల్పుడు
పరమపురుషు డిట్టి వాడు ధర నెవ్వడు లేడు

నిర్మల చారిత్రుడితడు నిరుపమాన ధీరుడు
నిర్మముడు లోకనుతుడు నిఖిలప్రాణి హితుడు
కర్మవీరు డుద్యోతిత నిర్మలస్వభావుడు
ధర్మమూర్తి యిట్టి వాడు ధర నెవ్వడు లేడు

శరణాగత పరిత్రాణ శపథంబును గలవాడు
నిరుపమాన వరదాతగ వరయశంబు గలవాడు
పరమశుభదాయకుడై భక్తులను ప్రోచువాడు
అరయ రాము నట్టి వాడు ధర నెవ్వడు లేడు