మరల నింకొక మాట

మరల నింకొక మాట మనవిచేసెడు లోన మరలిపోతివి నిన్న మంచి స్వప్నము లోన
చిరునవ్వు వెన్నెలలు చిక్కగా కురిపించి మురిపించి ఎన్నెన్నొ ముచ్చటలు పలికి నిరుపమానం బైన నీదయలు చిలికి మరి నాదు పొగడికలు మన్నించి వినుచు	మరల
నా కడకు వత్తువు నన్ను మన్నింతువు నీ కడకు మరియింక నేను వచ్చెదనని వేడుక మీరగ వినయంబుతో‌ నిన్ను వేడగ నెంచి నే విన్నవించగ నుండ	మరల
ఎన్నాళ్ళ నుండియో నన్నెఱుగుదు వీవు అన్నియు నెఱుగి నాయాశ నీవెఱురగవా ఇన్ని యాశలు దీర్చి యీయాశ దీర్చవా యన్న మాటను నే నడుగ బోవుచునుండ	మరల

(గమనికః తేదీ. 2016-07-21న వచ్చిన ఈ కీర్తన ఎందుకో వెలువడలేదు! ఇప్పుడు గమనించి ప్రచురించటం జరుగుతున్నది.)