ఎందుకింత నిరాదరణ యినకులతిలకా

ఎందుకింత నిరాదరణ యినకులతిలకా
యెందుకిలా మరలసొమ్ము కింతగ కటకట

చేయకయే దుర్వ్యయము చెల్లిపోయె సొమ్మంతయు
వేయనెట్టి పందెములు వెచ్చమాయె నంతయును
ఆయమేమొ సున్నాయెను అరయ రేపేమగునో
నీ యాశయ మిపుడు నన్ను నిర్ధనుని చేయుటయా

బందిపోట్ల వలె కర్చులు పట్టినన్ను దోచగా
అందగాడ రామచంద్ర ఆనంద మేమి నీకు
తొందరించ చీకాకులు ముందటివలె పాడలే
కుందునేమొ పరీక్షించు నూహ నీకు కలిగెనా

ఎన్ని జన్మముల నుండి యిట్లు పాడుచుంటినో
యెన్నెన్ని కష్టంబుల కేరీతి నోర్చితినో
యెన్నటికిని మాననురా యీశ్వర నీ కీర్తనము
చిన్న పెద్ద కష్టములా చిత్తము నీ ప్రసాదము