రండి రండి జనులారా రామభజనకు

రండి రండి జనులారా రామభజనకు కో
దండరామస్వామి వారి దయ దొరకేను

అంతులేని మహిమ గల ఆనందరాముని
గొంతెత్తి కీర్తించ గుమిగూడండి
చింతలన్ని తీర్చునట్టి శ్రీరాముని బుధ్ధి
మంతు లందరు గూడి మనసార పొగడండి

అయినవారు కానివార లని లేదు రామునకు
దయజూచు నందరను ధర్మప్రభువు
జయజయ శ్రీరామ జానకీ రామయని
వియత్తలమే మ్రోయ వేడ్కతో పొగడండి

రాముడే వెన్నుడు బ్రహ్మాండనాయకుడు
రాముడే మొక్షసామ్రాజ్య మిచ్చు
రాముడే సర్వలోకరక్షణాదక్షు డండి
రాముని భక్తిమీఱ రమ్యముగ పొగడండి