చైత్రశుధ్ధనవమి తిథియయ్యా
ఆరావణుని జంప అవతరించినట్టి
నారాయణమూర్తి వీవయ్యా
ధారుణీ జనులకు ధర్మమార్గము జూప
దయచేసిన శ్రీహరివయ్యా
కారుణ్యమూర్తివై కావుమన్న వారి
కాపాడు దేవదేవుడవయ్యా
దారి తెన్ను లేని దారుణసంసార
వారాశిదాటింతు వీవయ్యా
ధారాధరశ్యామ రవికులాంబుధిసోమ
ధర్మస్వరూపుడవు నీవయ్యా
ఈరేడు లోకాల నేలు దేవుడ వీవు
కూరిమి మమ్మేలు దొరవయ్యా
చేరి మ్రొక్కెడు వారు కోరు సంపదలెల్ల
ధారాళముగ నిచ్చు తండ్రివయా
శూరలోకంబెల్ల చేరి కొల్చుచు నుండ
శోభిల్లు దశరథసుతుడ వయ్యా
వారిజనాభుడవు భక్తపరిపాలనా
పరమదీక్షాపరుడ వీవయ్యా
వారిజాక్షుండవు భయనాశకుడవును
వరదాయకుడవును నీవయ్యా
వారిజాసనుడును వాసవుడు కామారి
ప్రస్తుతించెడు విభుడ వీవయ్యా
వారిజమృదుపాద వందనంబులు నీకు
బ్రహ్మాండనాయకుడ వీవయ్యా
