31, జులై 2019, బుధవారం
చేతులెత్తి మ్రొక్కితిని చిత్తము నీ కిచ్చితిని
చేతులెత్తి మ్రొక్కితిని చిత్తము నీ కిచ్చితిని
సీతారామ నీకు నేను సేవకుడ నైతిని
ఖ్యాతిగల శ్రీరాముడ కరుణారససాంద్రుడ
నా తప్పులు మన్నించెడు నాదేవదేవుడ
కోతికి బ్రహ్మపదము కొసరినట్టి ఘనుడ
నా తరమా నిన్ను పొగడ నళినదళేక్షణుడ
సకలలోకపోషకుడ శరణాగతరక్షకుడ
అకళంకవీరవరుడ అవనిజారమణుడ
సుకుమారుడ పరమసుందరాకారుడ
ప్రకటించితి నీవె నాకు పతివని రాముడ
పరమధర్మస్వరూపుడ సురవిరోధికాలుడ
పరమేశ్వరాభినుతుడ పరమేష్ఠివినుతుడ
పరమయోగీంద్రహృధ్బావితాంతరాత్ముడ
పరమభక్తజనసేవితపాదారవిందుడ
దీనికి సబ్‌స్క్రయిబ్ చేయి:
కామెంట్‌లను పోస్ట్ చేయి (Atom)
టైటిల్ లో సీతారామ నీకు నేను సేవకుడ నైతిని అని వ్రాసారు కదా ....క్రింద "ప్రకటించితి నీవె నాకు పతివని రాముడ" అని వ్రాసారు.
రిప్లయితొలగించండిసేవకుడికి పతి ఎలా ?
మంచి సందేహం వెలిబుచ్చారు. రూఢార్ధంగా పతి అంటే మగడు అన్న భావన స్థిరపడిన మాట వాస్తవమే. కాని పతి అన్న మాటకు చాలా అర్ధాలున్నాయి. రక్షకుడు లేదా ఏలిక అన్న భావనలో ఈ పతి శబ్దాన్ని ప్రయోగించటం సాహిత్యంలో పరిపాటియే. అలాగు గ్రహించ ప్రార్థన.
తొలగించండిచేతులెత్తి మ్రొక్కితిని చిత్తము నీ కిచ్చినాడ
రిప్లయితొలగించండిసీతారామ నీకు నేనైతిని సేవకుడ
అని వ్రాసి ఉంటే అన్నీ "డ" తో ముగించినట్లు అయ్యేది కదా ?
చందస్సు నాకు తెలియదు.
బాగా అడిగారు నీహారిక గారూ.
తొలగించండిఈకీర్తనలో హెచ్చుభాగం చరణాలూ చరణార్థాలూ డకార ప్రయోగంతో ముగుస్తూ ఉండటం గమనించి మీరు ఈ ఊహను చేసారు. బాగుంది. నేను కీర్తనలు వ్రాసేటప్పుడు ఒక ఒరవడిగా యతి ప్రాసలను పాటిస్తున్నాను. కొత్తదనం యేమీ లేదు, ఇది పాత సంప్రదాయమే. ఉదాహరణకు అన్నమాచార్యులవారూ అలా పాటించారు. ఇదేమీ నియమం కాదు కేవలం ఐఛ్ఛికం. రామదాసు గారు పాటించలేదు అలా.
ఇక్కడ పల్లవిలో
చేతులెత్తి మ్రొక్కితిని చిత్తము నీ కిచ్చితిని
సీతారామ నీకు నేను సేవకుడ నైతిని
ఇక్కడ చేచి తోనూ సీ కు సే తోనూ యతిమైత్రి చేయటం జరిగింది.
పాదంలో రెండవ అక్షరాన్ని ప్రాస అంటారు. ఇక్కడ మొదటి పాదంలోని తు కి రెండవపాదంలోని తా తో ప్రాస కుదర్చటం జరిగింది.
అంత్యప్రాసలను (పాదాల చివరి అక్షరాలను ఒక పోలికతో వాడటం అనేది) మాత్రం నేను నియతంగా కాక క్వచిత్తుగా మాత్రం వాడుతూ ఉంటాను.
ఇవి సాంకేతిక విషయాలు కాబట్టి మీకు కొంచెంగా అవగాహనకు ఇబ్బంది ఐతే మన్నించాలి.
మీకు ఛందస్సు అంతగా తెలియ నవసరం లేదు. పాడుకుందుకు వీలుగా అనిపిస్తే చాలు. కాని అనేక సందర్భాల్లో అది కూడా కొంచెం ప్రయత్నం మీద కాని ఒక బాణీ దొరక్కపోవచ్చును అన్నది వాస్తవం. ఒకే కీర్తనకు అనేక విధాల బాణీలు కట్టటమూ కుదురుతుంది.
మీరీ కీర్తనలను ఆసక్తితో చదువుతున్నందుకు నా ధన్యవాదాలు.