29, ఆగస్టు 2016, సోమవారం

ఈ బొమ్మ ఆడేది యెన్నాళ్ళు ?



ఈ బొమ్మ ఆడేది యెన్నాళ్ళు
ఈశ్వరు డాడించి నన్నాళ్ళు
ఈ బొమ్మకు సౌబ తెన్నాళ్ళు
డాబుగ నిది యాడు నన్నాళ్ళు

తానెందు కాడేది తానెరుగదే బొమ్మ
తానే యాడుదు నని తలచేను బొమ్మ
తానే గడసరి నని తలచేను బొమ్మ
దాని సంగతి చెప్ప తరముగా దమ్మ
ఈ బొమ్మ

నీటుతనముల బొమ్మ నిండైన బొమ్మ
మేటి యాటల బొమ్మ మేలైన బొమ్మ
మాటిమాటికి రూపు మార్చెడు బొమ్మ
పాటున కోర్వని బంగారు బొమ్మ
ఈ బొమ్మ

అక్కజమగు నడత నలరారు బొమ్మ
చక్కని దిది రామచంద్రుని బొమ్మ
దిక్కు వాడే నని తెలిసిన బొమ్మ
మిక్కిలి భక్తితో మెలగెడు బొమ్మ
ఈ బొమ్మ


(వ్రాసిన తేదీ 2014-09-12)

వ్యాఖ్యలు లేవు:

వ్యాఖ్యను పోస్ట్ చెయ్యండి

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.