వగచెద నెంతో వగచెద

వగచెద నెంతో వగచెద కాని

    ఫలితమేమియును లేదు కదా

వగచుట కంటెను ముదిమి ప్రాయమున

    మిగిలిన దేమియు లేదుకదా

లక్ష్యముచేయక పెద్దల నుడు లప

    రాధినైతినని వగచెదను

భక్ష్యాభక్ష్యవివేకము నెఱుగక

    భక్షించితినని వగచెదను

సాక్ష్యమెవ్వడని పలికిన వేల య

    సత్యము లెన్నుచు వగచెదను

సాక్ష్యమైన నాయాత్మసాక్షిని

    చక్కగ దలచుచు వగచెదను

ధనమే సర్వస్వంబని తలచెడు

    చెనటినైతినని వగచెదను

తనవారని పగవారని తలచుచు

    ధర్మమెన్ననని వగచెదను

వనితావ్యామోహంబున జిక్కుట

    వలన చెడితినని వగచెదను

తను విది శాశ్వత మన్న విధంబున

     తలచి చెడితినని వగచెదను

చేయరాని పను లెన్నియొ పొగరున

    చేసియుంటినని వగచెదను

మాయలుచేసెడు కలికి లోబడుచు

    మంచినెఱుగనని వగచెదను

చేయిదాటిపోయినది కాల మిక

    చేయున దేమని వగచెదను

ప్రాయము నందున రామనామమును

    చేయనైతినని వగచెదను