నీరేజదళనయన నిన్నే నమ్మితి

నీరేజదళనయన నిన్నే నమ్మితి
నా రాముడా నిన్నే నమ్మితి నమ్మితి

నమ్మితి నిను కౌసల్యానందన మృదుభాషణ
నమ్మితి నిను సురవైరినాశన నారాయణ
నమ్మితి నిను సురలోకనాయక వరదాయక
నమ్మితి నిను నన్నేలు నాథుడ వని యచ్యుత

నమ్మితి కరుణామయ నానమ్మకము నిలుపుమా
ఉమ్మలికములను ద్రోచి యుచితరీతి బ్రోవుమా
నెమ్మనమున నిలచి నీవు నిరతమును నడుపుమా
వమ్ముచేసి కలిమాయను భక్తుడ నన్నేలుమా

పరమపురుష నిను నమ్మితి భక్తవరద నమ్మితి
సరసుడ నిను నమ్మితి నా స్వామి వనుచు నమ్మితి
దరిజేర్చెద వని నమ్మితి ధరమీద నికపైన
మరల పుట్ట నని నమ్మితి తిరముగ నిను నమ్మితి