తెలియ నేరము మేము దేవదేవా నీదు దివ్యప్రభావంబు దేవదేవా
తెలియ రింద్రాదులు దేవదేవా ముసలి నలువకే తెలియదట దేవదేవా
తీరుగ సృష్టిజేసి దేవదేవా మమ్ము ఘోరభవాంబుధిని దేవదేవా
జార విడచుటేల దేవదేవా దాని తీర మెఱుంగలేము దేవదేవా
తీర మొక్కటి యున్న దేవదేవా దాని జేర నెవ్వరి వశము దేవదేవా
పారము జేరలేక దేవదేవా జీవు లారాట పడనేల దేవదేవా
వేలాది జన్మలెత్తి దేవదేవా మేము వేసట పడనేల దేవదేవా
ఈలాగు నీదియీది దేవదేవా యీదజాలక దుఃఖపడుచు దేవదేవా
నీలీల యిదియనుచు దేవదేవా లోలోన తెలియుదుమె దేవదేవా
మాలావు తెలిసియును దేవదేవా మమ్ము మాయలో నుంచకుము దేవదేవా
రాముడవొ కృష్ణుడవొ దేవదేవా నిన్ను మేమెట్లు తెలియుదుము దేవదేవా
కామారి చెప్పెనని దేవదేవా మేము రామ నామము నెపుడు దేవదేవా
ప్రేమతో చేయుదుము దేవదేవా భవము వెడలించవయ్య మము దేవదేవా
సామాన్యులము మేము దేవదేవా మమ్ము చక్కగా బ్రోవవే దేవదేవా
