తెలియరాని మహిమగల దేవదేవుడు

తెలియరాని మహిమగల దేవదేవుడు చేరి
కొలిచినచో మోక్షమిచ్చు గుణవంతుడు

మంచివారు చెడ్డవారు మనలో కలరు వీడు
మంచివాడగుచు కలడు మనకందరకు
అంచితముగ నితని చేరు నట్టివారికి వీడు
సంచితకర్మంబు లెల్ల చక్కజేయును

తనవారని పెరవారని తలచనివాడు వీడు
మనవాడని తలచితే మనవాడగును
మన రిపుషట్కమును ద్రుంచి మన్నించును వీడు
మన మానసములలోన మసలుచుండును

ప్రేమతోడ రామాయని పిలుచినంతట వీడు
పామరులకు సైతము పలుకుచుండును
భూమిసుతాపతి దయా భూషణుడు  వీడు
కామితార్థ మెల్లరకును కటాక్షించును