18, సెప్టెంబర్ 2016, ఆదివారం

ఈశ్వరుడే నా వాడైతే యితరులతో యిక బని యేమి



ఈశ్వరుడే నా వాడైతే యితరులతో యిక బనియేమి
శాశ్వతసుఖమే నాదైతే క్షిణికసుఖంబుల పనియేమి

ఎఱుగదగినదే యెఱిగితినా యితరవిద్యలే వలదు కదా
పొరబడి హరినే మరచితినా పొందగలిగినది లేదు కదా
కరుణాకరుడు సుగుణాకరుడు నిరుపమసుఖసంపత్కరుడు
పరమాత్ముడు శ్రీరాముడు నన్ను పాలించుటయే చాలు గదా
ఈశ్వరుడే

చిరుచిరువరములు కురిసేవారగు సురలనడుగుటే వలదుకదా
పొరబడి యడిగి తప్పైనదని పొగులుకర్మమే వలదుకదా
కరుణాకరుడు సుగుణాకరుడు నిరుపమసుఖసంపత్కరుడు
పరమాత్ముడు శ్రీరాముడు నన్ను పాలించుటయే చాలు గదా
ఈశ్వరుడే

అరకొర బ్రతుకుల నరులకు దొరకని హరికృప దొరకిన చాలుగదా
పరమభాగవతజనమందారుడు వదలకబ్రోచిన చాలుగదా
కరుణాకరుడు సుగుణాకరుడు నిరుపమసుఖసంపత్కరుడు
పరమాత్ముడు శ్రీరామముడు నన్ను పాలించుటయే చాలుగదా
ఈశ్వరుడే


వ్యాఖ్యలు లేవు:

వ్యాఖ్యను పోస్ట్ చెయ్యండి

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.