ఇటు రారా

 
రారా నిన్నే కోరితి మన
సారా నిన్నే కోరితి

తనివార నిను జూడ

మనసాయెరా హరి
మనసిజశతకోటి
ఘనసుందరా యిటు

మునికోటికే మరులు
జనియింపగాజేయు
నినుజూడ మనసాయె
వనజేక్షణా యిటు

భువనేశ్వరా రామ
పవమానసుత వనజ
భవశక్రభవవినుత
భవనాశక యిటు

రారా

 
రామ రామ సీతారామ
రారా నన్నేల
నీమీదనె నామనసు 
నిలిచెను హరి రారా

యాగరక్షణాదక్ష
హరి నీవిటు రారా
యోగిహృదయోల్లాస
యొప్పుగ నిటు రారా
భోగీంద్రశయన హరి
పొలుపుగ నిటు రారా
శ్రీగౌరీపతినుత
సీతాపతి రారా

కామితార్ధప్రదాయక
గరుడగమన రారా
కోమలాంగ శ్యామలాంగ
గోవిందుడ రారా
భూమిసుతాప్రాణపతీ
భువనేశ్వర రారా
క్షేమకరా భవతారక
నామా యిటు రారా

ప్రేమతో మాటలాడు
విభుడా యిటు రారా
నా మనవులు కొన్ని గలవు
నానాథుడ రారా
భూమిపాలకులతిలక
పురుషోత్తమ రారా
స్వామీ నీరాకకై
ప్రతీక్షింతు రారా

చక్కని వాడు

చక్కని వాడు రామచంద్రుడు వాడు
దిక్కు లన్నిటను పేరు కెక్కిన వాడు

మునివరులకు ముద్దు వచ్చు మోహనాంగుడు వాడు

జనకునకు ముద్దు వచ్చు వినయశీలి

జనుల కతడు మెచ్చుగొలుపు సద్గుణశాలి వాడు

జనకసుతకు ముద్దు వచ్చు శ్యామలాంగుడు

చక్కదనమునకే నిర్వచనమన నొప్పు వాడు

చక్కనైన విక్రమాతిశయము వాడు

చక్కగ భక్తులకు మోక్షంబు నిచ్చెడు వాడు

దిక్కై దీనులకు నిలుచు దేవదేవుడు

శ్రీరాముడు

శివుని యంత వాడగు యీ శ్రీరాముడు సదా
శివుని విక్రమమున నొప్పు శ్రీరాముడు

 
శివుని విల్లు విరిచినాడు శ్రీరాముడు రేగి
శివభక్తుని విరిచినాడు శ్రీరాముడు
శివప్రతిష్ఠ చేసినాడు శ్రీరాముడు మహా
శివుని పూజించినాడు శ్రీరాముడు 

శివుని పరమభక్తు డైన శ్రీరాముడు తాను 
శివుని గాంచి మ్రొక్కినాడు శ్రీరాముడు 
శివుడు పొగడ మురిసినాడు శ్రీరాముడు సదా
శివుడే తానైన హరి శ్రీరాముడు

శివుని యెడదలో నుండును శ్రీరాముడు సదా

శివుని యెడదలో నుంచును శ్రీరాముడు

శివుని యవతారమైన శ్రీరాముడు కే

శవుని యవతారమైన భవతారకుడు

నల్లనయ్య

గొల్లవాడ లెల్ల తిరిగి నల్లనయ్య చాల
కల్లోలము సృష్టించెను నల్లనయ్య

కొల్లగొట్టి వెన్నలన్ని నల్లనయ్య మా
చల్లకుండ పగులగొట్టె నల్లనయ్య మా
చెల్లె లడ్డగించితే నల్లనయ్య బుగ్గ
గిల్లి పారిపోయె నీ నల్లనయ్య

వెన్నలన్ని మెక్కి పోయి వేణువూద ఆ
పొన్న చెట్టు నెక్కె నీ చిన్ని దొంగ సం
పన్ను లింటి బిడ్డడైన బరితెగించి పాలు
వెన్న లన్ని కొల్లగొట్టు వేడు కేమి

అల్ల రెంత చేయ నేమి నల్లనయ్య మా
కెల్లరకును ముద్దువచ్చు నల్లనయ్య ఒక
పిల్లంగోవి చేత బట్టి నల్లనయ్య భువన
మెల్లను రంజింపజెయు నల్లనయ్య

బోధ

శ్రీమన్మంగళమూర్తిని రాముని

చిత్తములో ధ్యానించవలె

ఆమహనీయుని నామామృతమును

హాయిగ నిత్యము గ్రోలవలె

శ్రీరఘురాముని పాదాబ్జంబుల

సేవను మానక చేయవలె

రాముని భక్తులతో నెల్లప్పుడు

ప్రేమగ సంగతి చేయవలె

చక్కగ రాముని తత్త్వము భక్తుల

సంగతితో గ్రహియించవలె

రాముడె సత్యము రాముడె సర్వము

రాముడె జగమని తలచవలె

అంతఃకరణచతుష్టయమును రా

మార్పణముగ నొనరించవలె

రామభక్తుడై రామయోగియై

రామదాసుడై బ్రతుకవలె

కారణకారణు నన్యము లడుగక

ఘనముగ మోక్షము నడుగవలె

బ్రహ్మానందము బయటదొరకునా

రామమయం బని తెలియవలె

రామబంటు

 

రామచంద్రుని బంటునైతే 

రాము డెట్లా చూచు నయ్యా

రామపాదము విడువకుంటే

రాము డేమి చేయు నయ్యా

రామచంద్రుని బంటు వైతే

రాము డాదరించు నయ్యా

ప్రేమతో నిను చేరదీయును

కామితార్ధము లిచ్చు నయ్యా

రామబంట్లే భాగ్యశాలురు

భూమినందరి కంటె నయ్యా

రామబంటుగ నైన నిన్నా

బ్రహ్మయైనను గౌరవించును

రామపాదము రావణానుజు

లంక కధిపతి జేసెనయ్యా

రామపాదము పట్టు హనుమకు

ప్రభువు బ్రహ్మపదము నిచ్చెను

రామపాదము విడువకుంటే

ప్రభువు మోక్ష మైన నిచ్చును

రామబంటుగ మారవయ్యా

రామపాదము విడువకయ్యా

రక్షించరా దేవ

శ్రీరామ నీనామమే చేయుచున్నాను 

చేపట్టి రక్షించరా దేవ

వారాశిగర్వాపహారి భవవారాశిని 

పడియుంటి రక్షించరా దేవ

నీనామమే గాక నేనన్య మెఱుగను 

నిండార దయచూపరా దేవ

మానవేంద్రుడ నేను మానవాధముడనే 

మన్నించి రక్షించరా దేవ

నీపాదములె సాక్షి నీవాడనే నేను 

చేపట్టి రక్షించరా దేవ

కోపించవద్దు నాదోషంబులను జూచి 

గోవింద రక్షించరా దేవ

నీసాటిదైవంబు లేడంచు చాటించు 

నీ భక్తునిక బ్రోవర దేవ

దాసానుదాసుండ ధర్మవిగ్రహ నన్ను 

దయచేసి రక్షించరా దేవ

సత్ఫల మేమి

నాలుక భగవన్నామము పలుకక

నాలుక కలిగిన సత్ఫల మేమిక

చెవులకు భగవన్నామము సోకక

చెవు లున్నందుకు సత్ఫల మేమిక

కనులకు భగవద్రూపము కానక

కను లున్నందుకు సత్ఫల మేమిక

కరములు భగవత్సేవకు కదలక

కరములు కలిగిన సత్ఫల మేమిక

పదములు భగవత్సేవకు నడువక

పదములు కలిగిన సత్ఫల మేమిక

మనసుకు భగవత్తత్త్వము తోచక

మన సున్నందుకు సత్ఫల మేమిక

బ్రతుకును భగవంతున కర్పించక

బ్రతుకొక టుండిన సత్ఫల మేమిక

రాముని భగవంతునిగా తెలియక

భూమిని పుట్టిన సత్ఫల మేమిక

మనకేమి భయమయ్య

మనకేమి భయమయ్య మనరాము డుండగ 

    మనవాడై మనతోడుగ

కామలోభక్రోధమదమోహమాత్సర్య 

    ఘనరాక్షసులు డాసిన

భూమిజనులు చాల తామసులై తిట్టి 

    యేమని దండించిన

కల్లగురువులు వచ్చి కల్లమతముల దెచ్చి 

    గడబిడలే చేసిన

కల్లదేవుళ్ళకు కలి యెంత వత్తాసుగా 

    నిల్చి జళిపించిన

అన్నన్న తాపత్రయములెంత హృదయము 

    నగ్నిగోళము చేసిన

దున్నపోతు నెక్కి దుష్టుడైన యముడు 

    దుడుకుగ పైబడిన

కసరవచ్చునా

కొంటె కొంటె మాట లిట్లు  గోవిందా నీ
వంటె నేనూరు కో నయ్య జాగ్రత

కుంటిసాకు లెందుకే గొల్లభామా నే
నంటె నీకు ప్రాణమే వయ్యారి భామా నా
కంటబడగ వేచి యున్న కలికీ నేను
కంటబడగ వంక బెట్టి కసరవచ్చునా

గొంటుదనము మానవే గొల్లభామా నా
కంటె నాథు డెవ్వడే వయ్యారిభామా 
ఉంటి నేను తోడుంటే యువిద నీవు
కంటగించుకొని నన్ను కసరవచ్చునా 

కొంటె మాట లేమిటే గొల్లభామా నే
నంటున్నది తప్పా వయ్యారిభామా న
న్నంటుకొన్న కైవల్య మెంటే మోము
గంటునెట్టుకొని నిన్ను కసరవచ్చునా

శ్రీరామ రామ

శ్రీరామ రామ సీతారామ 
నారాయణా భవతారకనామ

ధారాధరశ్యామ దశరథరామ
వారాశిబంధన పట్టాభిరామ
నీరాక కోసం నేవేచియుంటి
కారుణ్య ధామా కనరావేమీ

ధరణిని తనువుల దాల్చుచు నేను
తిరుగుచు నుంటిని దిక్కుతోచకను
కరిగేను కాలము కడచె యుగములు
హరి నీవు రావేమి ఆదుకోవేమి

ఎన్నాళ్ళు వేచితి నికనైన నీవు
నన్నేలు కోవయ్య నా తండ్రి రామ
చిన్ని బిడ్డను నేను శ్రీరామ నీకు
నన్ను రక్షింపగ రావేమి తండ్రి

రామ గోవింద

రామ గోవింద రామ గోవింద 

కామారి సన్పుత రామ గోవింద 

శ్రీమంతుడా హరి రామ గోవింద 

ధీమంతుఢా హరి రామ గోవింద 

సామీరి సన్నుత రామ గోవింద 

నామొర్ర లాలించు రామ గోవింద 

కోమలాంగా హరి రామ గోవింద 

శ్యామలాంగా హరి రామ గోవింద 

పామరుడను నేను రామ గోవింద 

ప్రేమగా నన్నేలు రామ గోవింద 

ఆ మోక్ష మొక్కటె రామ గోవింద 

నామనోరథమయ్య రామ గోవింద 

మామంచి దేవుడ రామ గోవింద 

నామీద దయచూపు రామగోవింద

రామనామము చేయరే

రామనామము చేయరే రామనామము చేయరే
భూమిజనులకు మోక్షమిచ్చే రామనామము చేయరే

కామితార్ధము లిచ్చు నామము రామనామము చేయరే
కామరోగము నణచునామము రామనామము చేయరే
పామరత్వము బాపు నామము రామనామము చేయరే
క్షేమదాయక మైన నామము రామనామము చేయరే

కామవైరి జపించు నామము రామనామము చేయరే
ప్రేమతో రక్షించు నామము రామనామము చేయరే
శ్యామసుందరు దివ్యనామము రామనామము చేయరే
నీమముగ భక్తాళి నేలెడు రామనామము చేయరే

నరుడా వినరా

నరుడా వినరా పరమ సత్యము 
పరమ సుఖమును హరి యొసగేను

హరిని మరచెనా నరుడు చెడేను
నరుడు చెడేనా నరక మబ్బేను
నరక మబ్బేనా మరి బాధేనూ
హరి నెన్నడును మరువకు నరుడా

మరల పుట్టుట మరల చచ్చుట
మరల బాధల పొరలి యేడ్చుట
నరుని కెందుకు హరిని కొలిచిన
పరమ పదమునే నరుడు పొందును

హరినికొలుచుటే పరమసుఖమని
యెరిగిన నరుడే హరిని కొలుచును
హరిని కొలిచిన నరుడు ముక్తుడు
మరల పుట్ఝడు మరల పుట్టడు