21, జూన్ 2012, గురువారం

నీ వలె నుండ లేక నాకు తిప్ప లెన్నెన్నో

నీ వలె నుండ లేక నాకు తిప్ప లెన్నెన్నో
కావలసిన యొడుపు బాగ కలుగు దారి చెప్పరా

ఇవి యవి కావలయునని యేవేవో కామనలు
అవి దొరుకని వేళ చెప్ప నలవికాని భావనలు
పవలు లేదు రేయి లేదు పరితపించు నా మనసు
అవధరించ వయ్య యిది అంతులేని బాధ ప్రభూ

ఒక నాడు నీవు నేను నొక్క రీతి నుంటిమిగా
సకలము మనదగుట నాశామోహము లెరుగకను
అకట వేరు చేసితివి అవని కంపితివి నన్ను
వికటాట్టహాసములతొ  విరుచుకు పడెరా ఆశలు

విభవములు వింత లిచట వేలున్నా వలదు నాకు
అభయమిమ్ము దురాశల నధిగమించు సుళువిమ్ము
ఉభయుల మొకటే ననుట ఉట్టిమాట కానీకుము
ప్రభు నాకిక స్వస్వరూపావబోధ కలిగించుము