14, జూన్ 2012, గురువారం

సారెకు నిన్నే చక్కగ పిలువక శాంత మెక్కడిది రా సఖుడా

సారెకు నిన్నే చక్కగ పిలువక
   శాంత మెక్కడిది రా సఖుడా
వీరిని వారిని పిలిచి ముచ్చటల
   తేరుటలో రుచి లేదుగదా

అన్నిట నీవే కాన వచ్చెదవు

చిన్నగ నవ్వుచు పలుకరించెదవు
నన్నెప్పుడు నెడ బాయకుందు విక
నిన్ను మరతునా నేనొక క్షణమును

నీ పనుపున నే నిల కేతెంచితి

నీ పనిలో క్షణ మేమరచితినా
లోపమగును నే నన్యము దలచిన
నీ పనియే నాపనిరా సుఖమును

యేనాటి దయ్య మన సాన్నిహిత్యము

ప్రాణ సఖుడ పరుల నే నెరుగనయా
నేనును నీవు నిటు మానుగ నొకటను
పూనిక నుంటిమి పొలుపు మీరగ నిక