13, ఆగస్టు 2012, సోమవారం

నీ దయావృష్టి నా మీద కురిసిన చాలు వేదనలు మాయమై విరియు సంతోషాలు

నీ దయావృష్టి నా మీద కురిసిన చాలు
వేదనలు మాయమై విరియు సంతోషాలు

కనులు కలిపి పలుకరించు జనులు కానరాని చోట
మనసు తెలిసి మనసు కలుపు మనిషి తోడు లేని చోట
దినదినమును నీడ దక్క యనుచరులే లేని చోట
కనికరించి నీవు నాకు కలెగెదవా అది చాలును

ఇచట నావి తక్క యితరు లెవరి పాద ముద్రలెరుగ
ఇచట నేను తక్క యితరు లెవరి కంఠస్వరము నెరుగ
ఇచట నేను ఒంటరినై యేకతంబ గ్రుమ్మరుదును
ఇచటికి నీ వొక్కనాటి కేగుదెంచుటుయె చాలును

ఓ మహాను భావ అలసి యుంటి నన్న మాట తలచి
నా మొరాల కించి యింక నాకు ప్రసన్నుడవు కమ్ము
ఈ మేదిని నెల్ల నొంటి నెంత తిరిగి నిన్నరయుదు
సామాన్యుడ నీ‌ వాడను సామి మరువ కది చాలును

2 వ్యాఖ్యలు:

  1. చాలా బాగుంది మీరు దైవాన్ని వేడుకొనే విధానం...
    కనులు కలిపి పలుకరించు జనులు కానరాని చోట
    మనసు తెలిసి మనసు కలుపు మనిషి తోడు లేని చోట
    దినదినమును నీడ దక్క యనుచరులే లేని చోట
    కనికరించి నీవు నాకు కలెగెదవా అది చాలును....
    చాల బాగుంది....అభినందనలు శ్యామల రావు గారూ!
    @శ్రీ

    ప్రత్యుత్తరంతొలగించు
  2. వేడుకోలు చాలా బాగుంది. ఆర్తి తో పిలిస్తే పలకడా,కనబడడా..మరో మనిషి రూపములో...

    ప్రత్యుత్తరంతొలగించు

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.