21, ఏప్రిల్ 2020, మంగళవారం

మంచివాడు కదటయ్యా మన రాముడు


మంచివాడు కదటయ్యా మన రాముడు వాడు

మంచి మంచి వరములనే యెంచి యిచ్చేను



కొంచెపువా డన డొక్కని గొప్పవా డన డొక్కని

యంచితముగ నందరిని యాదరించేను

మంచివారి చెడ్డవారి మహితభాగ్యుల విధి

వంచితుల కందరకు వరదు డీతడు



రాముడే లేదను నొక రాలుగాయి వానిని

ప్రేమతో దరిజేర్చి వేదవేద్యుడు

కామితము లిచ్చు గాని కసరుకొన డయ్య

సామాన్యుడు సామవేది స్వామి కొక్కటే



తారకనామంబు నెపుడు తలచి మురియు వాడు

శ్రీరామ యనుటకే సిగ్గుపడు వాడు

ధారుణి నిర్వురును తనబిడ్ద లేనని

చేరిదీసి యాదరించి కోరిన విచ్చేను