ఏదో నీదయవలన ఈజీవి నరుడాయె
ఆదయయె అక్షయ మగును గాక రామ
నీనామ మెపుడును మరువక చేసిన నిలచేనేమో నీదయ
అనోట నీనామ మాడుచు నుండగ నాశీర్వదించవయా
నీమంగళాకృతిని నిత్యము కొలిచిన నిలచేనేమో నీదయ
నీమముగను తాను నిన్నే కొలుచునట్లు నీవె దీవింపవయా
నీసేవలో తాను నిలచియుండిన నెడల నిలచేనేమో నీదయ
దాసభావము గలిగి తాను నీసేవలో తనరగ జేయవయా
నీతత్త్వ మెల్లపుడు నిజబుధ్ధి నించిన నిలచేనేమో నీదయ
సీతారామా బుధ్ధి చెదరకుండగ నీవె చేయక తప్పదయా
నీదివ్యచరితమె పారాయణము చేయ నిలచేనేమో నీదయ
కాదనక ఆభాగ్యగరిమ కూడ నీవె కలిగించి ప్రోవవయా
నిన్నె పొగడుచు తాను నేలపై తిరిగిన నిలచేనేమో నీదయ
మన్నించి నిన్నెపుడు సన్నుతించు నట్టి మతిమంతు జేయవయా
నీభక్తులను తాను కూడియుండిన నెడల నిలచేనేమో నీదయ
శోభించ నీభక్తసుజనకోటి మధ్య చోటు కల్పించవయా
నిన్ను సర్వాత్మనా శరణువేడిన యెడల నిలచేనేమో నీదయ
మన్నించి తాను శరణాగతుడగు దారి మానక చూపవయా
కామెంట్‌లు లేవు:
కామెంట్‌ను పోస్ట్ చేయండి
ఆమోదించిన వ్యాఖ్యలే ప్రచురితం అవుతాయి. తరచుగా పరిశీలించటం వీలు కాదు కాబట్టి అప్పుడప్పుడు వ్యాఖ్యలు కనిపించటం ఆలస్యం కావచ్చును. తరచుగా జవాబులు ఇవ్వటం నాకు వీలు కాదు. ఎక్కువగా చర్చించటం అస్సలు వీలుకాదు.