25, ఆగస్టు 2017, శుక్రవారం
ఓ కూనలమ్మా!
వాదవివాదాలు
చేదుజ్ఞాపకాలు
వేదనాజనకాలు
ఓ కూనలమ్మా
తప్పులెన్నెడు చోట
ఒప్పు చూడని చోట
తిప్పలు పడనేల
ఓ కూనలమ్మా
అక్షరాలను తెచ్చి
లక్షణాలను కుక్కి
శిక్షించుటొక పిచ్చి
ఓ కూనలమ్మా
ఉరక వాదున జొచ్చి
కరకు మాటకు నొచ్చి
పరుగెత్త్తు టొకపిచ్చి
ఓ కూనలమ్మా
తనకేమి రాదాయె
పనిమాలి వాదాయె
జనులు నవ్వగ నాయె
ఓ కూనలమ్మా
పండగ పూటాయె
దండుగ వాదాయె
దండిగ బుధ్ధొచ్చె
ఓ కూనలమ్మా
దీనికి సబ్‌స్క్రయిబ్ చేయి:
కామెంట్‌లను పోస్ట్ చేయి (Atom)
నా మాటలతో మిమ్మల్ని బాధించినందుకు మన్నించండి.
రిప్లయితొలగించండిమిత్రులు శర్మగారు, మీ రెప్పడూ పొరపాటునా ఏమీ అనరు. నాకు తిక్కపుట్టించినది వేరేవారు. వారెవరో మీ రూహించగలరు సులువుగానే. ఈ నాలుగుపదాలూ ఊరకే తమాషాకు వ్రాసానంతే.
తొలగించండిమీకు, మీ కుటుంబానికి వినాయక చవితి శుభాకాంక్షలు.
రిప్లయితొలగించండిఆరుద్ర గారి శైలిలో కూనలమ్మ పదాలు బాగా వ్రాసారు. మీరేమనుకోకపోతే ఓ ఉ.బో.స - మీరు మరింత మొద్దుబారాలి శ్యామలరావు గారు. అంటే ఈ తరం పరిభాషలో "తోలుమందం" అవ్వాలి అన్నమాట. మీరు కాస్త ఎక్కువే sensitive లాగా తోస్తున్నారు. అలా ఉంటే కొంటె జనాలు మరింత కవ్విస్తుంటారు. మనం ఎదుటివాళ్ళకా అవకాశం ఇవ్వకూడదు. ఇవన్నీ మీకు తెలియవని కాదు.
తోలుమంద మా కాదు
తొలగించండికాలగ్నానమా లేదు
ఏలాగు రాదు చేదు
ఓ కూనలమ్మా.
విగ్నానంతోనే కదండీ కాలగ్నానం రావడం :)
రిప్లయితొలగించండిఅంతే నండీ అంతే సరిగ్గా చెప్పారు.
తొలగించండిఒకటి చాలు విగ్నానం
ప్రకటించు కాలజ్ఞానం
వికటవిద్య లజ్ఞానం
ఓ కూనలమ్మా
శ్యామలరావు గారు, నేను విన్నకోటవారి వ్యాఖ్యతో ఏకీభవిస్తున్నాను. ఇప్పుడే ఏదో బ్లాగ్లో ఈ quote చూసా. If you are nice to someone, there is no guarantee that they would be nice to you. It is like lion does not eat you because you don't eat a lion. అందరికి వినాయక చవితి పండగ శుభాకాంక్షలు.
రిప్లయితొలగించండిబాగా చెప్పారండీ
తొలగించండిఎన్నదగిన మాట
విన్నకోట మాట
వెన్నలాంటి దంట
ఓ కూనలమ్మా
మంచిమాటకు వచ్చు
అంచితముగ మెప్పు
మంచిమనసుల నుండి
ఓ కూనలమ్మా
అన్యగామిగారు, శ్యామలరావుగారు, 🙏
తొలగించండిపండగ పూటా హాయిగా గణేషుణ్ణి తలుచుకోక ఈ మందం తోలూ,కాల "గ్నానం" అనుకుంటూ ఈ గోల నాకు నచ్చలేదండి. చక్కహా ఓ పద్యం రాసి ఉంటే పుణ్యం పురుషార్ధమూ కాదుటండీ? మన శర్మ గారు ఏదో మొత్తానికి చవితి చంద్రుణ్ణి చూసినట్టున్నారు - నీలాపనింద మీద వేసుకుని మన్నించండి అనేశారు. :-) ఉండ్రాళ్ళు ఎలా చేస్తారో, బాగా వచ్చాయో లేదో రాయరాదుటండీ? అన్నట్టు ఉండ్రాళ్ళు అనేదానికి ఏకవచనం ఏమిటి? ఉండ్రం అనొచ్చా? :-) ఉండ్రాళ్ళు తినేటప్పుడు అధరువు ఆవకాయ బాగుంటుందా లేకపోతే మరో అల్లం చట్నీ కుదురుతుందా? శర్మ గారు ఏమిటి మీ రికమండేషను?
రిప్లయితొలగించండిDG గారూ
తొలగించండిశర్మగారికి ఎన్నడూ ఏనిందా రాదు.
నిర్మలాతి నిర్మలం
శర్మగారి మానసం
ధర్మతత్పరం సుమా
ఓ కూనలమ్మా