ఈ దేహము పడిపోతే నింకొక్కటి వచ్చురా

ఈ దేహము పడిపోతే  నింకొక్కటి వచ్చురా

ఆ దేహమును పడితే నావల నింకొకటి



నా దేహమె సుఖనిదానంబని నమ్మితివా

నీ దేహము నిత్యమై నీదిగా నున్నదో

ఆ దేవుడు నిర్ణయించి నన్నాళ్ళే నిలకడ

కాదటరా దీనిపై గాఢానురక్తి యేల



నీదు దుష్కర్మలను నీదు సత్కర్మలనే

ఆ దేవు డెంచి యిచ్చి నట్టిదీ దేహము

ఆ దేవుని పాల్జేసి యఖిల కర్మములను

యే దేహమును వల దీశ్వరా యనరా



ఆ దేవుడు రాముడై యవతరించి భూమిపై

నే దారి మంచిదో యెఱుగ జెప్పడే

నా దారియె నాదనకు ఆ దేవుని కాదనకు

కాదంటే చావుపుట్టుకల కంతు లేదురా



ఈ దేవుని వలదంటె నింకెవ్వరు కలరురా

ఈ దేవుడే దిక్కెల్లవారలకు

ఈ దేవుడు నీవాడని యికనైన నెఱుగరా

వాదములు మాని రామపాదముల నుండరా