నా బొమ్మ

యుగాలుగా నా బొమ్మ చెక్కుతూనే ఉన్నావు
కానీ యేనాడూ తిన్నగా కుదిరినట్లు లేదు
అయినా కుదిరీ కుదరని నా బొమ్మల్ని
అనేక చోట్లకు రవాణా చేసిచూసావు
అనేక పేర్లతో చెలామణీ చేసి చూశావు
ఒక్కదానికీ ఒకింత బుధ్ధెపుడూరాలేదు
ఒక్కదానికీ ఒకింత పేరెపుడూ రాలేదు
నా బొమ్మ చెక్కడం నువ్వు మానింది లేదు

పంచభూతాల నిష్పత్తి అంచనా తప్పుతోంది
మూన్నాళ్ళ ముచ్చటై పోతోందీ బొమ్మ
త్రిగుణ వర్ణాల పాళ్ళు తప్పుతూనే ఉన్నాయి
ఊదిన సుగుణాలు వెలాతెలా పోతున్నాయి
నామకరణంలో దోషాలు నాకే తెలుస్తున్నాయి
భూమి మీద నా బొమ్మకు పేరు రావటం లేదు
నువ్వెలా చేద్దామని నిర్ణయించు కున్నావో
నవ్వుల పాలై పోతున్నది నా బొమ్మే ప్రతిసారీ

యేమీ అనుకోక పోతే ఒక్క మాట చెబుతాను
యేదోదో ఊహించుకు యెందుకిలా చెక్కుతావు
ఒక్కసారి ప్రయత్నించి యిలా చెక్కిచూడు
చక్కగా నీరూపున నన్ను చెక్కి చూడు
అన్నిరకాల పాళ్ళూ హాయిగా కుదురుతాయి
యేదైనా పేరుపెట్టి యెక్కడికైనా పంపు
నా పేరు సంగతి సరే నీకు పేరు వస్తుంది
మంచి బొమ్మను చెక్కిన మాట మిగులుతుంది