పండనీ

 పండనీ యీబ్రతుకు భగవంతుడా నీ
యండనే యటుగాక యది యెందుకు

నరవేషమును వేసి ధర నుండు టెందుకు

పరమాత్మ నినుగూర్చి పాడుటకు కాక

కరచరణములు దాల్చి గర్వించు టెందుకు

తరచు నీసేవలో తిరుగుటకు గాక

ధర నిన్ను వెదకుచు తిరుగాడు టెందుకు

పరమాత్మ నీవు నాభావ మందుండ

సురుచిరంబులు భావసుమము లవి యెందుకు

హరి నీకునై నిత్యమమరుకు గాక

నాకండ వగు శ్రమయు నీకెందుకో రామ

నీ కన్యమెఱుగక నేనుండుటను కాక

నాకున్న బ్రతుకిదియు నీకొఱకు గాక

నాకేల కోరదగినది యేమి కలదు