నిద్దుర రాదాయె నాకు నీదయ వలన నిదుర
వద్దులే నీనామమె ముద్దు నాకు
అనుక్షణము నీతో నే నంటకాగి యుండగలనా
దినమంతయు పనిపాటులు తినివేయగా
మనసారా నీ నామమాధుర్యమాన సమయము
కనుగొనగ రాత్రి తప్ప కనబడదే
ఎన్ని నిన్ను కీర్తింప నెంతగానో కోరుదును
మన్నింపుము చాల పవలులు చన్నువృథలై
యన్ని దెసలు శాంతమగుచు నున్న రాత్రివేళ లందు
సన్నుతించెదను నేను నిన్ను రామా
ఎందుకయ్య మరల నిదుర నించుకంత విశ్రాంతి
చెందు నా తనువు నిన్ను చింతించుచు
నందువలన అమితమైన హాయి కలుగుచుండగను
పొందవలయునా నిదుర పురుషోత్తమ
