సారసాక్షులార

సారసాక్షులార యుపచారము లిపుడు

చేరి సలుపరే మన శ్రీరామునకు

మించుబోడు లార తెచ్చి మంచిగంధాలు

వంచనలేకుండ మీరు వాని కలదరే

పంచదారమిఠాయిలును పాలునుపండ్లు

కొంచువచ్చి తినిపించరె కూరిమి మీర

మంచిమంచి బొమ్మలను మన బాలునకు

చంచలాక్షులార తెచ్చి చాల యీయరే

మంచిమంచి వింజామరలను బూని

యంచితముగ వీయరే హాయిగొలుపగా

అంచగమనలార బాలు డలసిన వేళ

మంచిజోలపాటల నిదురించ జేయరే