9, జనవరి 2014, గురువారం

నీ గుడివాకిట నిలచితిని




నీ గుడివాకిట నిలచితి నింతలో
ఆగితి నిదె లో నడుగిడ దగుదునో

మానవుడను దుర్మానిని నేను
కానిపనులను కపటంబులను
మానగ లేని మతిహీనుడను
ఏనాటికి మన్నించి దిద్దుదువొ      		॥నీ గుడివాకిట॥

ధర్మము నెఱిగి యధర్మము నెఱిగి
ధర్మమార్గమును తలదాల్చనుగా
కర్మమెట్టిదో కట్టుబడితి నీ
ధర్మేతరమున దయజూపవయా   		॥నీ గుడివాకిట॥

అన్నియు తెలిసి న న్నేమనని నిను
కన్నుల జూడగ కడు సిగ్గాయెను
నిన్నే నమ్మితి నీవే దిక్కిక
ఎన్నడు యోగ్యత నిచ్చెదో రామ  		॥నీ గుడివాకిట॥




వీరిచే పోస్ట్ చేయబడింది వద్ద
లేబుళ్లు:

1 కామెంట్‌:

  1. SD9 జనవరి, 2014 9:38 PMకి

    బాగుందండి. మీ పద్యాలు చదివినప్పుడల్లా కంచెర్ల గోపన్న గురుకొస్తున్నాడు. ఆయనకున్న చనువు (ఎవడబ్బ సొమ్ము అని...) రాముడి దగ్గిర మీకు లేదులా ఉంది. :-)

    ఈ మధ్యన ఏమీ రాయడం లేదులా ఉంది. పూతన ఖంఢ కావ్యం ఎప్పుడు పూర్తి చేస్తున్నారు? అంతా కులాసాయేనా?

    రిప్లయితొలగించండి

ఆమోదించిన వ్యాఖ్యలే ప్రచురితం అవుతాయి. తరచుగా పరిశీలించటం వీలు కాదు కాబట్టి అప్పుడప్పుడు వ్యాఖ్యలు కనిపించటం ఆలస్యం కావచ్చును. తరచుగా జవాబులు ఇవ్వటం నాకు వీలు కాదు. ఎక్కువగా చర్చించటం అస్సలు వీలుకాదు.

దీనికి సబ్‌స్క్రయిబ్ చేయి: కామెంట్‌లను పోస్ట్ చేయి (Atom)