2, నవంబర్ 2011, బుధవారం

కనుపించని నిను చూడాలని నా కనులు రేబవలు తపించునయా

పలుచని స్పృహగల వారు రేబవలు పరితపించినా ఫల మేమి
   తెల్లముగా తమ సత్వమె నీవను  తెలివిడి వారికి లేదు గదా

కనుపించని నిను చూడాలని నా కనులు రేబవలు తపించునయా
  నీ కొక రూపము  లేదని యెఱిగే తెలివిడి వాటికి లేదు గదా

వినిపించని నీ మాటవినాలని చెవులు రేబవలు తపించునయా
   మరి మౌనమె నీ భాషగ నెఱిగే తెలివిడి వాటికి లేదు గదా

ఎటనో దాగిన నిను నా పదములు వెదుక  రేబవలు తపించునయా
    నీకొక తావని లేదని యెఱిగే తెలివిడి వాటికి లేదు గదా

దయగనుమని నిను చేతులు పూజలు చేసి రేబవలు తపించునయా
      చేతులు కాదు చేతలు గుణమను  తెలివిడి వాటికి లేదు గదా

మంత్రములతొ నిను భావించెదనని  రసన రేబవలు తపించునయా
     వట్టి పలుకులకు పట్టుబడవనే తెలివిడి  దానికి లేదు గదా

 యెడబాయని నీ చెలిమి మరగినది యెడద రేబవలు  సుఖించునయా
     తెలివిడి యనగా దానిది కాదా   తెలియును తనలో నిన్ను సదా

2 వ్యాఖ్యలు:

  1. లయబద్ధమైన మీ గేయం సెలయేరై పరుగులెత్తింది. బాగుంది.
    అయితే ఎందుకో అసంపూర్ణం అనిపిస్తోంది. చివర తెలివిడి దేనికి ఎలా వస్తుందో చెపితే బాగుండేది.

    ప్రత్యుత్తరంతొలగించు
  2. సత్యం. ఇది అసంపూర్ణమే. ఈరోజు పూర్తి చేయాలి. నిన్న ప్రొద్దుపోయిన తరువాత వ్రాసినదిది. నిద్రాసమయం అని రిమైండరు రావటంతో ఆపవలసి వచ్చిందో వేరే యేదో కారణమో మధ్యలోనే లేఖిని ఆగింది. ఈ రోజు పూర్తి చేస్తాను. బహుశః ఒకటి రెండు చరణాలు కొత్తవి రావచ్చును. మీ వ్యాఖ్యకు ధన్యవాదాలు.

    ప్రత్యుత్తరంతొలగించు

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.