జయనామసంవత్సరం ఉగాది పద్యాలు

ఈ రోజున  కొద్ది సేపటి క్రిందట హైదరాబాదులోని (మియాపూర్) శ్రీకృష్ణదేవరాయ సాహితీస్రవంతి వారు నిర్వహించిన జయనామసంవత్సర ఉగాది కవిసమ్మేళనంలో పాల్గొని నేను చదివిన పద్యాలు.

కం. ఎల్లి యుగాది యనం గవు             లుల్లంబుల  జేయు నట్టి యూహల రీతుల్             దెల్లంబుగ నెఱిగిన మీ             కెల్లరికిని వందనంబు లివె వేనూఱుల్             మ. మేలగు వాక్చమత్కృతికి మేదిని నేను కవీశ్వరుండనే             మేలును గూర్చి బల్కుటకు మిక్క్లిలి నీతివిశారదుండనే             మేలొనరింతు నంచు బరిమీదికి వచ్చి వచింప నేతనే             చాలనివాడ నయ్యు కడు సాహసినై పలుకాడ వచ్చితిన్             మ. ఇదిగో యీ జయనామ వత్సరము రానే వచ్చి కూర్చుండె ని             య్యది యైనం బిసరంత మంచి పని చేయంజాలునో జాలదో             మది నూహింపగ రాక యున్నది కదా మానేలపై సౌఖ్యసం             పదలే యిబ్బడిముబ్బడౌనొ ప్రజలన్ బాధించునో యాతనల్             చం. గ్రహములు తిన్నగా తిరుగు గావుత నింక శుభాస్పదంబులై             యహరహమున్ వచశ్శరమహానలకీలల రువ్వునట్టి యా             గ్రహములు జూపు నాయకుల గర్వము లింక నడంగు గాక లో             కహితము కొల్లగా గలుగు గాక జయంబను వత్సరంబునన్             కం. అని తర్కించుచు నుండగ             మనసును పొంగించు నట్టి మంచిశకునముల్             కనబడినవి  మనప్రజలకు             మనభాషకు నభ్యుదయము మహి నెసగుననన్             ఆ.వె.  మావి కొమ్మ బల్కె మధురపుంస్కోకిలా             గీతికలను తెలుగు జాతి జయము             గంధవహునితోడ కబురు పంపించెను             పూల తీవె తెలుగుభూమి జయము             ఉ. కల్గును మాయు రాజ్యములు కల్గును మాయు సమస్తభోగముల్             కల్గును మాయు నెయ్యములు కల్గును మాయు విరోధభావముల్             కల్గును మాయు సృష్టి నుడికారపుసొంపుల తెల్గుభాషకున్             కల్గును వృధ్ధి తప్పక జగంబున నిత్యవినూత్నశోభలన్             చం. ఒకటికి రెండు వాకిళుల నుంచి యిదే తెలుగిల్లు నేడు వే             డుక మరి రెండు రెట్లగుట డోళ్ళ ఘనాఘన ఘోషణంబులన్             ప్రకటన చేయు స్వాగత మవశ్య ముగాది జయాబ్దలక్ష్మి ర             మ్మిక జయశీల నీవు పరమేశ్వర దివ్యకృపాపయోధివై             అను.  ఉగాది నాడు సంతోషం మొగాన పొంగి పొర్లనీ             దిగంతవ్యాప్తమై శాంతిన్ జగాన నిండి పోవనీ             స్వస్తి.

స్వతంత్రభారతంలో రాజకీయపార్టీలు - 1

మన ప్రియతమ భారతదేశంలో ఎన్ని రాజకీయపార్టీ లున్నాయి? ఈ ప్రశ్నకు సమాధానం కొరకు మనం భారత ఎలక్షన్ కమీషన్‌వారి వెబ్‌సైట్‌ను పరిశీలించాలి. మన ఎలక్షన్ కమీషన్ సమాచార పత్రం ప్రకారం 18-జనవరి-2013నాటికి మనదేశంలో ఆరు జాతీయస్థాయి రాజకీయపార్టీలూ, 54 రాష్ట్రస్థాయిపార్టీలూ‌ ఉన్నాయి.  ఇవి కాక మరొక 1392 పేర్లు నమోదు చేసుకొని గుర్తింపు ఇంకా పొందని పార్టీలు కూడా ఉన్నాయి. జాతీయస్థాయి రాజకీయపార్టీలు 1. బహుజన్ సమాజ్ పార్టీ. 2. భారతీయ జనతా పార్టీ. 3. కమ్యూనిష్ట్ పార్టీ ఆఫ్ ఇండియా. 4. కమ్యూనిష్ట్ పార్టీ ఆఫ్ ఇండియా (మార్క్సిష్ట్) 5. ఇండియన్ నేషనల్ కాంగ్రెస్ 6. నేషనలిష్ట్ కాంగ్రెస్ పార్టీ గుర్తింపుపొందిన రాష్ట్రస్థాయి రాజకీయపార్టీల సంఖ్య  1. ఆంధ్రప్రదేశ్ 2 12. మణిపూర్ 7  2. అరుణాచల ప్రదేశ్ 2 13. మేఘాలయ 2  3. అస్సాం 3 14. మిజోరాం 3  4. బీహార్ 3 15.  నాగాలేండ్ 1  5. గోవా 1 16. ఒరిస్సా 1  6. హర్యానా 2 17. పాండిచ్చేరి 4  7. జమ్మూ - కాశ్మీర్ 3 18. పంజాబ్ 1  8. జార్ఖండ్ 4 19. సిక్కిం 1  9. కర్నాటక 1 20. తమిళనాడు 3 10.  కేరళ 3 21. ఉత్తరప్రదేశ్ 2 11. మహారాష్ట్ర 2 22. పశ్చిమ బెంగాల్ 3 ఈ వివరాలకు ఆధారమైన ఎలక్షన్ కమీషన్ సమాచార పత్రం  తరువాత కాలంలో మూడు సార్లు  9-4-2013, 15-10-2013, 4-11-2013 నాటి పత్రాల్లో సవరించబడింది. పేర్లు నమోదు చేసుకొని గుర్తింపు ఇంకా పొందని పార్టీల సంఖ్య 9-4-2013 నాటికి 1415 కు చేరింది. అక్టోబరు 15, 2013 నాటికి కర్నాటకలో‌ మరి రెండు ప్రాంతీయపార్టీలు పుట్టుకొచ్చాయి. పేర్లు నమోదు చేసుకొని గుర్తింపు ఇంకా పొందని పార్టీల సంఖ్య 1508కు చేరింది. పేర్లు నమోదు చేసుకొని గుర్తింపు ఇంకా పొందని పార్టీల సంఖ్య  4-11-2013 నాటికి 1534కు చేరుకుంది. జనవరి 18, 2013 నాటికి  YSR Congress పార్టీ కాని, దాని గుర్తు సీలింగ్ ఫాన్ కాని ఎలక్షన్ కమీషన్ సమాచార పత్రం లో కానితదుపరి కమిషన్ వారు వెలువరించిన సవరణ పత్రాల్లో కాని అదే పేరుతో కనిపించటం‌ లేదు!  ఈ YSR Congressను 2009లో శివకుమార్ అనే లాయరుగారు రిజిష్టరు చేసుకున్నట్లుగానూ, దానిని 2011 మార్చి నెలలో జగన్మోహనరెడ్డి హస్తగతం చేసుకున్నట్లుగానూ వికీపీడియావారి సమాచారం.  అది  ఎలక్షన్ కమీషన్ వారి వెబ్‌సైట్లో 1392వ గుర్తింపు లేని పార్టీగా Yuvajana Sramika Rythu Congress Pary అనే పేరుతో కనిపిస్తోంది.  ఈ‌విషయాన్ని సదరు పార్టీవారి 2012 ఎలక్షన్ ఖర్చుల వివరాల పత్రం ఋజువుచేస్తోంది కూడా.  ఐతే సీలింగ్ ఫాన్ గుర్తును ఇప్పటికీ ఆ పార్టీకి శాశ్వతంగా కేటాయించినట్లు కనబడటం లేదు. పైన ఇచ్చిన ప్రాంతీయపార్టీల పట్టికలో చిన్నరాష్ట్రాలైన మణీపూర్ పాండిచ్చేరిల్లో ఎన్నేసి ప్రాంతీయపార్టీలున్నాయో గమనించితే ఆశ్చర్యం‌ కలుగుతుంది. అలాగే మన స్వతంత్రభారతదేశంలో పదిహేనువందలకు పైగా పార్టీలపేర్లు ఇంకా కార్యకలాపాలు కొనసాగించటానికి సిధ్ధంగా ఉన్నాయో గమనిస్తే మరింత ఆశ్చర్యం కలుగుతుంది. [ కొత్త ఎలక్షన్ షెడ్యూలు వెలువడిందని అందరికీ తెలిసిందే. దాని వివరాలు ఇక్కడ   చూడండి.]