నీమాట కెదురేది నీరజాక్షుడా

నీమాట కెదురేది నీరజాక్షుడా నీ

వే మందు వది ధర్మవివరణము



మృగమవు రాజులము మేము నిన్ను వేటాడ

తగదే చెట్టు వెనుక దాగియుండగ

జగమున ధర్మేతరు జంపరే రాజులు

తగునని వాలిని దండించిన రామ



బ్రతుకెల్ల ధర్మమును భంగపుచ్చి పాండవుల

కతిద్రోహివై ధర్మ మడుగుదువు భీము

ప్రతినయు మునిశాప వాక్యము నిటుదీరె

ధృతరాష్ట్రసుత యను కృష్ణావతార



అంచితమగు ధర్మ మది నీస్వరూపము

కొంచెపు బుధ్ధివా రెంచగ లేనిది

మంచిచెడుల గూర్చి మాకేమి యెఱుక మే

మెంచుదుము నిన్ను సేవించుభాగ్యము