కొలువైయున్నాడు కోదండరాముడు
చెలులార యిటురారే
కొలుచువారల కెల్ల నీరామచంద్రుడు
కొంగుబంగారమే
చేరి యుందరు మీరు శ్రీరామచంద్రుని
చిత్తశుద్ధిగ కొలువరే
కూరిమితో మీరు శ్రీరాముని కొలిచి
కేరింతలు కొట్టరే
వారిజాక్షుని మహిమ వర్ణించు కృతులను
ధారాళముగ పాడరే
ఆరాముని గొప్పలను పొగడుచును మీరు
హారతు లందించరే
దాశరథి దొడ్డదయను పొగడుచు మీరు
దండములు పెట్టరే
పాశహస్తుని బాధ మాకింక లేదని
పదిమందిలో చాటరే
తారకరాముని పూజించి భవచక్ర
తాడన మొనరించరే
చేరి శ్రీరాముని శ్రీపాదములు సం
సారము తరియించరే
