రాముడా లోకాభిరాముడా దండాలు

రాముడా లోకాభిరాముడా దండాలు
నీమహిమకు నీకు వేల దండాలు

కలువరేకుల కన్నులున్న కులపావనుడా నిన్ను
వలచిరట మునులుగూడ పరమసుందరా
నలుదెసలను నీసొగసుల వెలుగులే నిండి లోక
ముల లోన నీపేరు మారుమ్రోగుచున్నది

బలే పొడుగుచేతులున్న విలుకాడవురా నీదు
బలమునకు సాగరుడే తలవంచెనురా
ములుకులతో లోకకంటకులను గూల్చినావురా
నిలిచిపోవు నీపేరు కలకాలము ధరను

కొలుచుకొనువారి కెల్ల కొంగున బంగారమా
పులుగుకైన నీదయచే మోక్షమబ్బురా నీవు
తలచుకున్న ప్రకృతియును తలవంచునురా
తలచెదనీ నామమునే దాటెద నే భవమునే