అందరి వాడీ రాముడు

అందరి వాడీ రాముడు మన మడిగిన విచ్చే రాముడు
కొందరు లేడనగానే కీర్తికి కొంచెము కాని రాముడు

సత్యసంధుడీ రాముడు బహు సరసహృదయుడీ రాముడు
నిత్యము భక్తుల కోర్కెలు తీర్చే నిరుపమానుడీ రాముడు

భృత్యపోషకుడు రాముడు కడు పుణ్యచరితుడీ రాముడు

ప్రత్యర్ధులు సురవిరోధుల నొంపవచ్చిన దేవుడు రాముడు

పరమపావనుడు రాముడు పాపపర్వతవజ్రము రాముడు

కరుణామయుడీ రాముడు యోగివరసన్నుతుడీ రాముడు

పరదైవతమీ రాముడు శివపార్వతి వినుతుడు రాముడు

తిరముగ గొలిచిన కైవల్యమునే వరముగ నిచ్చే రాముడు

రండి రండి దేవుళ్ళు వచ్చిరండి

రండి రండి దేవుళ్ళు వచ్చిరండి వచ్చి మ్రొక్కండి
పండుగ లప్పు డైన భక్తి మీరు చాటండి

వెన్నెలవంటి చిరునగవుల వీరే రామచంద్రులు
కన్నుల కరుణకురియుచున్న కలికి మన సీతమ్మ
ఎన్నగ వీరె తల్లిదండ్రు లెల్లవారి కిది నిజము మన
పున్నెము పండి వచ్చినారు తిన్నగ మీరు మ్రొక్కండి

మూడులోకములకు వీరు మూలమైన దేవుళ్ళు
ఏడుగడలు వీరు మనకు నెల్లవేళ లందును
వేడుకగా వీరి కిపుడు వివిధోపచారములు కా
పాడు దైవములకు మ్రొక్కి పధ్ధతిగా చేయండి

వేయండీ దండ లిపుడు వివిధవర్ణశోభితములు
పూయండీ గంధములను పుణ్యమూర్తులకు నిపుడు
చేయండీ పూజలిపుడు చేతులార దేవుళ్ళకు
మీయంతటి ధన్యులింక మేదినిలో నుండరండి

దినదినమును

దినదినమును శ్రీరామనామమును
 తీయగ పలుకుచు నున్నావా
దినదినమును శ్రీరామసేవలో
 దిగి పనిచేయుచు నున్నావా

అనుదినమును శ్రీరాముని కీర్తన

 లాలాపించుచు నున్నావా

అనుదినమును శ్రీరాముని సత్కథ

 వినుచు చదువుచు నున్నావా

అనుదినము శ్రీరాముని భక్తుల

 గని భాషించుచు నున్నావా

అనుదినమును శ్రీరాముని పూజల

 నానందించుచు నున్నావా

అనుదినమును శ్రీరాముని భావన

 యందే తనియుచు నున్నావా

అనుదినమును శ్రీరాముని యవియివి

 యడుగక కొలుచుచు నున్నావా

అనుదినమును శ్రీరాముని దయ కే

 మన్యము నడుగక యున్నావా

అనుదినమును శ్రీరాముని కైవ

 ల్యమునే వేడుచు నున్నావా

నమ్మితిని శ్రీరామచంద్రా

నాకు నీవే రక్షకుడవని నమ్మితిని శ్రీరామచంద్రా

నీకు మ్రొక్కుదు గాని యేమియు నేను కోరను రామచంద్రా

తల్లి వీవే తండ్రి వీవే దశరథాత్మజ రామచంద్రా

యెల్లవేళల నాకు వలసిన దిచ్ఛుచుండే రామచంద్రా

వెల్లువై కష్టములు నన్నిట విరుచునప్పుడు రామచంద్రా

చల్లగా నాకెపుడు చేతిని జాచువాడవు రామచంద్రా

భువనమందున నీకు బిడ్డలు పోల జీవులు రామచంద్రా

ఎవరి కేనా డేది యీవలె నెరుగుదువుగా రామచంద్రా

శివుడు తారకమంత్ర మిచ్చుచు చెప్పెనిది శ్రీరామచంద్రా

అవిరళమ్ముగ నిన్ను కొలిచెద నంతియే హరి రామచంద్రా

చాలదా

శ్రీరామనామము ప్రాణమైన జీవితమ్మే చాలదా

ఆరాముడే నీప్రాణసఖుడై నట్టి బ్రతుకే చాలదా

హరి దివ్యగాథాలహరి వినెడు నట్టి చెవులే చాలవా

హరి నామమొకటే పలికి మురిసెడు నట్టి నాలుక చాలదా

హరి పూజలందే నిత్యముండెడు నట్టి కరములు చాలవా

హరి క్షేత్రములనే తిరుగుచుండెడు నట్టి కాళ్ళే చాలవా

హరి రూపములనే చూడగోరెడు నట్టి కన్నులు చాలవా

హరితత్త్వచింతన మందు నిలిచెడు నట్టి బుధ్ధియె చాలదా

హరిభావనారతి ననిశముండెడు నట్టిమనసే చాలదా

హరి కరుణకన్యము నాకు వలదను నిశ్చయంబే చాలదా

హరిభక్తులే నీకాప్తబంధువు లైన నదియే చాలదా

హరి కన్యదైవము లేడులేడను నట్టి ధృఢతయె చాలదా

హరి విశ్వకర్తయు విశ్వమయుడను నట్టి యెరుకే చాలదా

హరి మోక్షమిచ్చును వేరు వరముల నడుగ ననుటే చాలదా

రేపేమి జరుగనున్నదో

రేపేమి జరుగనున్నదో నా
పాపమేమి పండనున్నదో

ఇన్ని దశాబ్దాల జీవిత మేమి నేర్పినది నాకు
తిన్నగ పదినాళ్ళు చిక్కులన్నవే లేని దెపుడు
ఇన్నాళ్ళుగా నేననుభవించినవే చాలవో
ఎన్నాళ్ళని సుఖము కోరి యీ‌ యెదురుచూపులు

పతితిపావనా రామా పతితుడనో భ్రష్టుడనో
యతిశయమై పురాకృతంబైన పాప మెంతున్నను
సతతము నీనామస్మరణ సలుపుచున్న దీనుడనే
అతులితమగు నీదయామృతము నందించకున్న

ఒక్కసారి రామా యన తుక్కగునే పాపంబులు
నిక్కువముగ రామ నిన్ను పెక్కుడు జన్మంబులుగ
చక్కగ భజియించు నన్ను మిక్కిలిగా నాదరించి
దిక్కై నీవుండకున్న తెల్లంబుగ నాబ్రతుకున

ఇచ్చట రాముని పాటల ముచ్చటలే

కల్యాణి

ఇచ్చట రాముని పాటల ముచ్చటలే దొరకు నండి

వచ్చి స్వయముగా నరసి మెచ్చి మీరు పాడుకోండి

నిండు మనసుతో రాముని నిత్యము సేవింతురా

పండుగయే రామునిపై పాటలనే పాడుకొనుట

రండి సుజనులార మీరు రామునిపై కీర్తనలు

దండిగా లభించు నిచట తప్పక విచ్చేయండి

పదేపదే రామాయని పలుకుచును మురియుచును

సదా హృదయముల రామసన్నిధియే కలవారికి

ముదావహముగా నిచట నే ప్రొద్దనకను భక్తి మీర

సదారామభజన జరుగు సంతోషముగ రండి

హరినామ స్మరణమందె నిరంతరము గడుపువారు

తరింతురు మరల వారు ధరకు వచ్చు పనే లేదు

హరినామము మారు మ్రోగు నట్టి మంచిచోటి దండి

పరుగున శ్రీరామభక్తవరు లారా రండి రండి

దిక్కంటే అందరకూ దిక్కు రాముడే

 

దిక్కంటే అందరకూ దిక్కు రాముడే

దిక్కంటే అన్నిటీకీ దిక్కు రాముడే

సర్వలోకములకు రామచంద్రు డొకడె దిక్కు

సర్వకాలములను రామచంద్రు డొకడె దిక్కు

సర్వజీవులకును రామచంద్రు డొకడె దిక్కు

సర్వవిధములుగను రామచంద్రు డొకడె దిక్కు

సర్వదిక్కులందు రామచంద్రు డొకడె దిక్కు

సర్వకష్టములను రామచంద్రు డొకడె దిక్కు

సర్వవ్యాధులందు రామచంద్రు డొకడె దిక్కు

సర్వులును తరింప రామచంద్రు డొకడె దిక్కు

జయజయ రామా గోవిందా హరి

జయజయ రామా గోవిందా హరి జానకిరామా గోవిందా

జయజయ శ్రీమన్నారాయణ హరి జయ దాశరథీ గోవిందా

 

త్రిజగత్పావననామా రామా దేవదేవ హరి గోవిందా

భుజంగశయనా రమానాయకా పుండరికాక్షా గోవిందా 

త్రిజగత్కారణకర్తా రామా దివ్యప్రభావా గోవిందా 

విజయరాఘవా వీరవరేణ్యా విశ్రుతచరితా గోవిందా

 

సకలలోకపరిపోషక రామా సర్వోత్తమ హరి గోవిందా

సకలాగమసన్నుతప్రభావా సద్భక్తావన గోవిందా

వికటదైత్యసంహారక రామా విజయరాఘవా గోవిందా

వికచోత్పల బహుసుందరనయనా విమలచరిత్రా గోవిందా 

 

వలచి పలికిన భవము వదిలించు మంత్రము

వలచి పలికిన భవము

  వదిలించు మంత్రము

తెలిసి చేసేరు రామ

  దేవుని మంత్రము

సీతమ్మ నిత్యమ్ము చింతించు మంత్రము

వాతాత్మజుం డెపుడు పాడేటి మంత్రము

ధాతయును శివుడు ధ్యానించు మంత్రము

భూతలమున పేరు పొందిన మంత్రము

ఆతతాయికు శిక్షలందించు మంత్రము

పాతకములనెల్ల వదిలించు మంత్రము

నూతనమగుచు నెపుడు నొప్పెడు మంత్రము

ప్రీతిగ సుజనుల బ్రోచెడు మంత్రము

కలనైన మరువక కమనీయ మంత్రము

కులుకుచు చేసేరు గోవిందు మంత్రము

కలిదోషముల బాపు కళ్యాణ మంత్రము

అలయక చేసేరు తులలేని మంత్రము

రామచంద్రుని సాటి యెవరండి

రామచంద్రుని సాటి యెవరండి శ్రీ

   రామచంద్రుని కీర్తి చాటండి

రామ రామ యని తరించండి శ్రీ

  రామచంద్రుని మహిమ చాటండి

పతితపావనుడైన రామచంద్రుని పేరు

  పలికితేనే చాలు పండిపోయేరు

కుతుకంబుతో నైన రామచంద్రుని మీరు

    కొలిచితేనే చాలు పండిపోయేరు

అతికీర్తిమంతుడౌ రామచంద్రుని మీరు

    స్తుతియించితే చాలు పండిపోయేరు

అతికృపామతియైన రామచంద్రుని మీరు

   ఆశ్రయించిన చాలు పండిపోయేరు

అకళంకవీరుడౌ రామచంద్రుని కీర్తి

  ప్రకటించితే మీరు పండిపోయేరు

సకలార్ధప్రదుడైన రామచంద్రుని కీర్తి

   చాటించితే మీరు పండిపోయేరు

సకలలోకేశుడౌ రామచంద్రుని కీర్తి

   సన్నుతించిన మీరు పండిపోయేరు

సకలవిధముల రామచంద్రుని బంట్లుగా

   చరియించితే మీరు పండిపోయేరు

పండిపోయేరు హరి పూజలను మీరెల్ల

  అండగా హరి నిల్చి యుండును కాన

పండిపోయేరు హరి సేవతో మీరెల్ల

  భగవంతునకు సేవ పండించు గాన

పండిపోయేరు హరి భక్తులై మీరెల్ల

  భాగవతులకు ముక్తివచ్చును కాన

పండిపోయేరు రఘువరు డాన మీరెల్ల

  ప్రభుపాదముల నాశ్రయించిరి కాన

    

ఏమి రుచి యీ రామనామము

ఏమి రుచి యీ రామనామము

నామవర మీ రామనామము

 

శివునికృపచే రామనామము

  చేరినది జిహ్వాగ్రమందున

వివిధగతులను రామనామము

  వెలసినది జిహ్వాగ్రమందున

పవలురేలును రామనామము

  పరగినది జిహ్వాగ్రమందున

అవిరళంబుగ రామనామమె

  యమరినది జిహ్వాగ్రమందున

జనులు పొగడే రామనామము

  సాగినది జిహ్వాగ్రమందున

మునులు పొగడే రామనామము

  మురిసినది జిహ్వాగ్రమందునఇ 

ఘనతచెందిన రామనామము

  కమ్మనగు జిహ్వాగ్రమందున

దినదినంబును రామనామము

  తేజరిలు జిహ్వాగ్రమందున

పాపమణచే రామనామము

  పలికినది జిహ్వాగ్రమందున

తాపమణచే రామనామము

  తానొదిగె జిహ్వాగ్రమందున

కాపుదలయై రామనామము

  కలిగినది జిహ్వాగ్రమందున 

నాపుణ్య మిది రామనామము

  నాకొదవె  జిహ్వాగ్రమందున

 

నందగోపసుతావంద్య

నందగోపసుతావంద్య బృందారకజనవంద్య

నందివాహనా త్రిపురసుందరీశ మునివంద్య

వందనమో శివశంకర ఫాలవిలోచన హర

వందారు భక్తసుజనమందార దురితహర

సుందరాకార ఉమాసుందరీ సహిత లోక

వందిత సంసారభయాపహర భవతాప హర

వందనమో సదారామవందితచరణారవింద

వందనమో రామనామపారాయణసదానంద

వందనమో మహాదేవ వరదాయక శుభదాయక

అందె నాకు భవతారక మద్భుతముగ నీదయచే

నీయందు మాబుధ్ధి

కాంభోజి

నీయందు మాబుధ్ధి నిలచి యుండు నటుల

జేయుమా సర్వేశ శ్రీరామచంద్ర

మాయచే కాయముల మతిమాలి ప్రేమించి

నీయందు బుధ్ధినే నిలుపగ లేము

మాయదారి మాయ నీయునికినే గప్పి

వేయగా నిన్నెరుగు విధమేది దేవుడా

మాయలోనే పుట్టి మాయలోనే పెరిగి

మాయలోనే చచ్చు‌ మాబోంట్లకు

మాయ యొక టున్న దను మాట తెలియుట యెట్లు

తోయంబులకు వెలి తోచునా చేపలకు

ధ్యేయుండ వగు నిన్ను తెలియనీయదు మాయ

మాయింద్రియము లందు మసలుట చేత

నీయాన గొని యాడు నీమాయ తొలగితే

ఓయయ్య నిను విడచి యుండునా మాబుధ్ధి 

హరికి ప్రియుడై యుండువాడు

అరయ నెవ్వడు పరమప్రియుడు

పరమపురుషు డైన హరికి

హరిని మనసున తలచువాడే

  హరిని మనసున నిలుపువాడే

హరిని మనసా కొలుచువాడే

  హరికి ప్రియుడై యుండువాడు

హరిని విడువని మనసువాడే

  హరిని జగమున గనెడువాడే

హరిని పరముగ నెరుగువాడే

  హరికి ప్రియుడై యుండువాడు

హరిని నీత్యము గనెడువాడే

  హరి కితరమును గననివాడే

హరియె బ్రతుకుగ నుండువాడే

  హరికి ప్రియుడై యుండువాడు

హరేరామా యనెడువాడే

  హరేకృష్ణా యనెడువాడే

హరే శరణం బనెడువాడే

  హరికి ప్రియుడై యుండువాడు

హరినామములే వరమంత్రంబులు

హరినామములే

  వరమంత్రంబులు

నరులారా యిహ

  పరసాధనములు

ఒకమంత్ర మిచ్చు సిరుల 

  నొకమంత్రమిచ్చు బలము

నొకమంత్ర మిచ్చు స్థిరత

  నొకమంత్ర మిచ్చు బలగ

మొకమంత్ర మిచ్చు ప్రభుత

  నొకమంత్ర మిచ్చు సుఖము

హరిమంత్ర మిచ్చు నండి

  యన్నియును మీకు నిజము

పరమంత్రములను మీరు

  బడయు సిరులు సుఖములును

ధరను విడచు సమయమున

  తరలిరావు వెనుదగిలి

హరిమంత్ర మాశ్రయించు

  నరు డెన్నటికిని చెడడు

హరేరామ యనువాడు

  హరినిచేరు సుఖముగను

భక్తులము హరిభక్తులము

భక్తులము హరిభక్తులము హరి

భక్తివినా మా బ్రతుకే లేదు

 

హరిలీలలనే మననము చేయుచు

  పరవశ మందే వారము 

హరిసేవలతో ననవరతంబును

  మురియుచు తిరిగే వారము

 

హరిని తెలుపు నితిహాసము లందే

  యాదర ముంచే వారము

కరుణామయు డగు హరికే మనసా

  శరణాగతు లగు వారము 

 

కనులారా హరి చిద్రూపమునే 

  కనుగొని మురిసే వారము

మనసారా హరినామావళినే 

  పనవుచు మురిసే వారము

 

దినదినమును హరిసంకీర్తనమే 

  తీయగ పాడే వారము

క్షణక్షణమును హరిసన్నిధి లోనే 

  గడపుచు మురిసే వారము

 

హరేరామ యని ఆరాముని మే

  మన్నిట కనుగొను వారము

హరేకృష్ణ యని అహర్నిశలు భజ

  నానందము గొను వారము

 

పరాకు నైనను పరదైవతముల

  భావన చేయని వారము 

పురారి సన్నుతు డగు శ్రీహరినే

  ముక్తిని వేడెడు వారము 

  

రామనామరసమానసరాజహంసలకు గాక

కళ్యాణి.?

 

రామనామరసమానసరాజహంసలకు గాక

రామ తత్త్వమెఱుకగాదు రాము నెఱుగరాదు

 

కామవైరి వలన గాక రామనామలబ్ధి లేదు

రామనామభజన లేక రామభక్తి కుదురుకోదు

రామభక్తిపరులు గాక రామసేవ బడయలేరు  

రామసేవకులకు గాక కామాదుల గెలువగాదు

 

కామాదివికారరహితఘనత బడసి నిత్యము శ్రీ

రామయోగు లగుచు నిల విరాజిల్లెడు యోగివరులు

రామనామరససరసిని నీమంబుగ నీదుచు రఘు

రాముని లోనెఱిగి సదా రామునితో నుండు వారు

 

కరుణించరా స్వామి కమలాయతేక్షణ

ఆహిరి.?

కరుణించరా స్వామి కమలాయతేక్షణ
తిరముగ మది నిన్నేమరక కొలుచు నను

సదమలచారిత్ర్యసంశోభితా రామ
విదళితామరవైరివీరగణా హర్ష
మొదవగ నా కామమోహాది రిపువర్గ
మదమును పెకలించి ముదము చేకూర్చర 

వేవేల నామాల వెన్నుడ నీమహిమ

భావించి మెప్పించు ప్రతిభ లేకున్నను

నీవాడనే కాని పైవాడనా యేమి

సేవించు నామొరలు చిత్తగించవు స్వామి

జగముల పుట్టించి చక్కగా పోషించి

తగ లోగొను దేవా దాసుడ నేగానా

నిగమాగమవిదిత నిత్య శుధ్ధబ్రహ్మ

మగు నీవే శరణమో యభవ భవమోచన

వేదాద్రిశిఖరాన వెలసిన దీ సింహము

వేదాద్రిశిఖరాన వెలసిన దీ సింహము 

కోదండరామాఖ్య గొన్న సింహము 

 

మత్తదైత్యగజేంద్రమును 

  మట్టుబెట్టు నరసింహము

బత్తిజూపు వారికి వరదసింహము

ఎత్తున వేదాంతగుహల 

  నెసగు బ్రహ్మమగు సింహము

కొత్తదైవతములకు కొదమసింహము

 

వినయశీలురైన భక్త

  వీరుల హృద్వీధు లందు

దినదినము నూరేగు దివ్యసింహము

మునిమానసరాజహంస 

  యనెడు ప్రఖ్యాతి మిగుల

గొనిన ముక్తి నొసగెడు గొప్పసింహము