29, మార్చి 2023, బుధవారం

శరమదే రావణుపై జనుచున్నది

శరమదే రావణుపై జనుచున్నది

విరించిమంత్రపూతమై వెలుగుచున్నది


రయమున పరువెత్తు శరము రాముని శరము

భయమును తొలగించు శరము బంగరు శరము

జయమును కలిగించు శరము చక్కని శరము

వియచ్చరులు మెచ్చు శరము వెన్నుని శరము


మునుల వెతల దీర్చు శరము పొలుపగు శరము

వనితల కసి దీర్చు శరము పావన శరము

ధనదుని పగ దీర్చు శరము దారుణ శరము

ఇనకులేశు దివ్యశరము ఇంపగు శరము


కాముకుని జంపు శరము ఘనమగు శరము

పామరత్వ మణచు శరము భగవఛ్ఛరము

భూమిజ చెఱబాపు శరము రాముని శరము

స్వామికరవిముక్తశరము బ్రహ్మాస్త్ర శరము