14, జనవరి 2019, సోమవారం

దండిగ నీయండ దయచేసితివా


దండిగ నీయండ దయచేసితివా
పండువే ప్రతిదినము భగవంతుడా

పండువౌనా క్రొత్తబట్టలిన్ని కట్టగనే
పండువౌనా పంచభక్ష్యంబులతో
పండువౌను పున్నెములు పండగ మెచ్చీవు
నిండుగ దీవించి నీదయ కురిసినపుడె

ఉన్నవాడండ్రు ధనమున్నవాడిని జనులు
ఉన్నవాడండ్రు భూము లున్నవాని
ఉన్నవాడనగ నెవడన్న దెరుగరు వారు
ఉన్న వాడు నీదయ యున్నవా డొక్కడే

రాముడా నీవు నన్ను రక్షించి యాదరించి
గోముగ దయామృతము కురిపించి
సామర్ద్య మిచ్చితివి చక్కగ నిన్నుపొగడ
ఏమయ్య పండుగే ఏదినమైన నాకు