24, జనవరి 2019, గురువారం

గోవిందునకు పూజ కొంచమైన లేదు


గోవిందునకు పూజ కొంచమైన లేదు లే
దే వేళ పొట్టపూజ కెడమింత లేదు

ఈ మే నశాశ్వతమను యెఱుకయే లేదు
కాముడనే తుంటరిని కాచుకొనుట లేదు
తామసమున మంచి లేదన్న స్పృహ లేదు
పామరత్వమే కాని పాపభీతి లేదు

ఆముష్మికము పట్ల నసలు చింతలేదు
భామ వెంటరాదన్న భావనే లేదు
ఏమి కుక్షింభరత్వ మితరమే లేదు
భూమి నింతకాల మున్న బుధ్ధిమార లేదు

ధీమంతులను గూడి తిరుగుటే లేదు
రామనాముమును చేయు లక్షణము లేదు
రాము డొక్క డున్నాడన్న లక్ష్యమే లేదు
రాముని దయ దొరుకకున్న సేమమే లేదు