14, నవంబర్ 2017, మంగళవారం

దూతవంటె నీవేలే తోకరాయడా నీ చేతలన్ని ఘనములే తోకరాయడా


దూతవంటె నీవేలే తోకరాయడా నీ
చేతలన్ని ఘనములే తోకరాయడా

రవిసుతుని దూతవై తోకరాయడా శ్రీ
రవికులపతి నరసినావు తోకరాయడా
రవికులేశు మైత్రి గూర్చి తోకరాయడా నీవు
ప్లవగేంద్రుని కాచినావు తోకరాయడా

శ్రీరాముని దూతవై తోకరాయడా పెద్ద
వారాసిని దుముకినావు తోకరాయడా
వారిజాక్షి సీత నరసి తోకరాయడా లంక
బీరమెల్ల కాల్చినావు తోకరాయడా

రామభక్తజనుల కెల్ల తోకరాయడా నిన్ను
కామధేను వందురయ్య తోకరాయడా
రామాజ్ఞను గొని రమ్ము తోకరాయడా నన్ను
స్వామికడకు కొనిపొమ్ము తోకరాయడా


10 వ్యాఖ్యలు:

  1. భజన కీర్తన గా బాగుంటుందనుకుంటున్నానండి

    ప్రత్యుత్తరంతొలగించు
  2. నాకు ఈ పాట భలే నచ్చేసిందండి. వెంతనే పాడి మీకు పంపించేశాను. ఏమనుకోకుండా ఒకసారి వినండి. పాట వరస నచ్చకపొతే మన్నించండి.

    ప్రత్యుత్తరంతొలగించు
    ప్రత్యుత్తరాలు
    1. విన్నానండీ. బాగుంది. మీరు పట్టుకున్న వరస సరిగ్గానే ఉంది. నేను కట్టిన వరసకూడా అదేనండి! పాట మీకు నచ్చినందుకు ధన్యవాదాలు. పాడినందుకు మరొక సారి ధన్యవాదాలు. వెంటనే మీ గానం పంపినందుకు ఇంకొక్కసారి ధన్యవాదాలు.

      తొలగించు
    2. పాట ఆడియో టపాలో పెట్టవలె! ప్రయత్న పూర్వకముగానైనా వినవలె

      తొలగించు
    3. సాయంత్రమో రాత్రో ప్రయత్నిస్తానండీ.

      తొలగించు
  3. ప్రత్యుత్తరాలు
    1. మీరు ఈ‌ మాటలు తెలుగులో వ్రాసి ఉంటే బాగుండును. పోనివ్వండి.

      హమనుంతుడి లాంగూలం పైన ఒక స్తోత్రం కూడా ఉంది. అందులో‌ ప్రతి శ్లోకంలోని ఉత్తరార్ధమూ లోలలాంగూల పాతేన మమారాతీన్నిపాతయ అని ఉంటుంది. అయనకు దీర్ఘలాంగూలధారి అని స్తోత్రాల్లో వస్తున్నది కదా!

      జ్వలత్ కాంచన వర్ణాయ దీర్ఘలాంగూల ధారిణే
      సౌమిత్రి జయదాత్రేచ రామదూతాయ తే నమః (నారదపురాణం)

      లాంగూలం సంస్కృతపదం - దానికి తెలుగు తోక. ఇందులో తోక అన్నప్పుడే శ్రావ్యతాలోపం ఎక్కడుందో బోధపడదు. జానపదధోరణిలో తేలికపదాల్లో పాట వ్రాసినపుడు తోకరాయడు అన్న పదప్రయోగం నాకైతే బాగుంది. మీకోసం‌ మార్చలేను. అన్నమయ్య కోనేటిరాయడు అన్నప్పుడు కొందరు మీబోంట్లకు ఆపదం కర్ణపేయంగా తోచకపోయి ఉండవచ్చును ఆనాడే.

      తొలగించు
  4. ఎందుకో ఆంజనేయస్వామికి పన్నెండు మంచి పేర్లు ఉండగా తోకరాయుడు అన్నపదం నాకు మనస్కరించడం లేదు. పెద్దలు పండితులు ఆపైన మీ ఇష్టం.

    ప్రత్యుత్తరంతొలగించు

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.