24, అక్టోబర్ 2017, మంగళవారం

నిను గూర్చి వ్రాయుదునా - నను గూర్చి వ్రాయుదునా


నిను గూర్చి వ్రాయుదునా నను గూర్చి వ్రాయుదునా
అను ప్రశ్న వచ్చె నయ్య ఆనతీయవయ్య రామ

సకలలోకములు నీవు చక్కగా చేసితివి
సకలలోకములు నేను చక్కగా తిరిగితిని
సకలలోకపరిసేవిత చరణయుగళి నీది
సకలలోకసంభ్రమణ చరణయుగళి నాది

ప్రకృతిపైన నేకాకృతి వగువాడవు నీవు
ప్రకృతి ననేకాకృతుల బడయు వాడ నేను
సుకృతవంతసంసేవ్యసుగుణరాశివీవు
వికృతబుధ్ధిగలుగు దుర్వినీతుడను నేను

నిను గూర్చి వ్రాయగా నేనెంతవాడ
నను గూర్చి వ్రాయగా నేమున్నవాడ
మనవి చేసితి నిజము మన్నింపుమయ్య
పనిచి నీ తోచినటుల వ్రాయించవయ్య


వ్యాఖ్యలు లేవు:

వ్యాఖ్యను పోస్ట్ చెయ్యండి

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.