6, నవంబర్ 2016, ఆదివారం

ఇత్తువని పునరావృత్తిరహితపదమును


ఇత్తువని పునరావృత్తిరహితపదమును
చిత్తమున నమ్మితి శ్రీరామచంద్ర

కొత్తకొత్త జన్మములు కొత్తకొత్త బంధములు
కొత్తకొత్త దుఃఖములు కోరుదునా
యెత్తినవే చాలునింక యేలుకోవయ్య నా
బత్తినెఱిగి రక్షించ ప్రార్థింతు నిన్ను
ఇత్తువని

అందని గౌరవముల కలమటింపులు చాలు
పొందినభోగముల పొలుపులు చాలు
చెందితి నిదె నీదు శ్రీపాదములకు చే
యందించి నను బ్రోవ మనుచు ప్రార్థింతు
ఇత్తువని

కోరెడు వారలకు నీవు కొంగుబంగారమవు
ఈరేడులోకముల నేలుడు దొరవు
నారాముడవని నిన్ను నమ్ముకొన్నాడ నా
ప్రేమనెఱిగి బ్రోవుమని వేమరు ప్రార్థింతు
ఇత్తువని


2 వ్యాఖ్యలు:

  1. మీ ఈ రచన "ఎక్కడి మానుష జన్మంబెత్తిన ఫలమేమున్నది" ని గుర్తు చేసింది.
    శుభాభినందనలు!

    ప్రత్యుత్తరంతొలగించు
    ప్రత్యుత్తరాలు
    1. ఈ జీవుడు శ్రీరామచంద్రమూర్తికి విన్నవించుకుంటున్న ఈ‌ సంకీర్తనలను ఎందరు చదువుతున్నారో తెలియదు. బ్లాగుపోష్టులను పరిశీలిస్తే చదివే వారిసంఖ్య స్వల్పాతిస్వల్పం. కాని మీరు శ్రద్ధతో వీటిని చదివి విశ్లేషించుకొనటం చాలా సంతోషకరంగా ఉంది. మీకు రామానుగ్రహం సంపూర్ణంగా లభించాలని ఆకాంక్షిస్తున్నాను.

      తొలగించు

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.