9, అక్టోబర్ 2016, ఆదివారం

హరిమీద గిరి యుండె



హరిమీద గిరియుండె గిరిమీద హరియుండె
హరిగిరు లిటు లుండ గిరి గిరగిర తిరిగె

సురలసురులు నా వాసుకి కవ్వపు త్రాడుగ
గిరిమంధరము క్షీరశరధిని కవ్వముగ
తరచువేళ గిరి మునిగెడి దైన బొబ్బలిడగ
నిరుపమానమైన మహిమ నిండారగ నిటుల
హరి

కడు కఠినమైన చిప్ప కల కూర్మం‌ బగుచు
నడగడిగో‌ కొండ క్రింద నవతరించినాడు
వడి తిరిగెడు గిరియొరుగక పట్టి నిలుపు చుండ
నిడిగిడిగో కొండమీద నిదే నిలచినాడు
హరి

నాడు శ్రీకూర్మ మగుచు నడిపి నాటకమును
వాడే శ్రీరాము డగుచు వసుధ నేలి నాడు
వాడే భవవార్నిధిని వేడుకతో జొచ్చి
వాడుక నందరను కాచు పైన క్రింద నుండి
హరి


3 వ్యాఖ్యలు:

  1. కూర్మావతారం గురించిన ఈ రచన చాలా బావుంది. ఇదే వరసలో దశావతారాలలో మిగిలిన తొమ్మిదీ రచించగలిగితే ఒక మంచి ఆధ్యాత్మిక-రచనా శ్రేణి అవగలదు.

    ప్రత్యుత్తరంతొలగించు
    ప్రత్యుత్తరాలు
    1. లలితగారూ, తప్పకదశావతారవర్ణనాకీర్తనశ్రేణి వస్తున్నదండీ. రేపే నృసింహావతారకీర్తన వెలువడుతున్నది. రాముడిచ్చిన శక్తిమేరకు ఈ‌రామకీర్తనలను వెలువరించటానికి యత్నిస్తున్నానండి. ఇంకా ఎంత సమయం నా వద్ద ఉన్నదో తెలియదు కాని వీలైనంతగా ఇవి వెలువడాలని నా ఆరాటం. ఆపైన రామేఛ్ఛ.

      తొలగించు
  2. సురలు శరణుయని సొంపుతొ వేడగ
    కరుణతొ మందర గిరి పృష్టమునను
    గురుతుగ నిడుకొని పరదేవతలను
    నిరుపమానముగ నీవు బ్రోచితివి
    కూర్మావతారా! జయ కూర్మావతారా!

    ప్రత్యుత్తరంతొలగించు

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.