9, సెప్టెంబర్ 2016, శుక్రవారం

ఆతడు పెట్టిన యన్నము కానిది ఆరగింపు కలదె




ఆతడు పెట్టిన యన్నము కానిది ఆరగింపు కలదె
ఆత డొసంగిన శక్తియుక్తుల కన్యమొండు కలదె

ఆతడిచ్చిన తనువిది కాక ఆకృతి యన నేది
ఆతడిచ్చిన ఊపిరి కాక ఆధారం బేది
ఆతడిచ్చిన తలపులె కాక అన్యబుద్ధి యేది
ఆతడిచ్చిన పలుకులె కాక అన్యం బొండేది
ఆతడు

ఆతడు నడిపించు నట్లే అడుగులు కదిలేను
ఆతడు తలపోసి నట్లే అన్నియు నమరేను
ఆతడు సెలవిచ్చు నట్లే అన్నియు జరిగేను
ఆతడు నీవాడనేలే యననటె జరిగేను
ఆతడు

ఆతడు నాదేవదేవుడే యన్నది తెలిసేనే
ఆతడు కరుణాంతరంగుడే యన్నది తెలిసేనే
ఆతడు నా ప్రాణపతియే యన్నది తెలిసేనే
అతడు శ్రీరామచంద్రుడే యన్నది తెలిసేనే
ఆతడు


వ్యాఖ్యలు లేవు:

వ్యాఖ్యను పోస్ట్ చెయ్యండి

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.