7, సెప్టెంబర్ 2016, బుధవారం

విజ్ఞుడనో కానొ




విజ్ఞుడనో కానొ వివరింపు మీవే
అజ్ఞుడ నను వార లటులుండ

ఈ నేలపై బుట్టి యిన్ని మారులును
మానుగ నీయందు మదినిలిపి
పూని నీవును నన్ను పొలుపుగ నేలగ
నీ నెయ్యమున జేసి నిలచితి గాన
విజ్ఞుడ

భావించెదను నేను పరమాత్ముడవని
నీ వాల్లభ్యపు నిత్యభాగ్యమున
పావన రామ నీపద దాసుడను
నీవాడనై నేడు నిలచితి గాన
విజ్ఞుడ

నాకు దేవుడవీవు నీకు నే దాసుడ
నీకై బ్రతుకుట నా కర్తవ్యము
లోకేశ శ్రీరామ లోకమునందు
నీకన్య మెఱుగక నిలచితి గాన
విజ్ఞుడ


వ్యాఖ్యలు లేవు:

వ్యాఖ్యను పోస్ట్ చెయ్యండి

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.